Shah tar ïit ïong ka kali sorkar bad shah weng ka siren, bun kiba buaid bad ka ñiah kali

Nongpoh, K’Lyngkot 02: Khlem da pynlut por ha iing ha sem bad kiba ieid ba thoiñ, ki pulit ka Ri-Bhoi hapoh ka jingïalam u VS Rathore Senior Superintendent of Police lem bad ki pulit ophisar haka miet jong ka 31 tarik Nohprah kaba dei ka sngi khatduh jong u snem 2025 shuwa ban pdiang ïa u snem thymmai, kila mih madan biang sha surok ban pyndep la ka jong ka kamram naka bynta ka jingshngaiñ jong ki paidbah haka leit ka wan namar kumba ju long haki snem bala leit noh bun ki jingjia aksiden ki jia haka miet ban pdiang ïa u snem thymmai tang namar ka jingbuaid naka jinglehkmen.
Shuwa kane ka jingmih madan sha surok ban talasi naphang ïaki kali naka liang ki pulit kila dep ban maham lypa lyngba ki rynsan social media kum ka pharshi ba kin sdang ïaka jinglehkmen snem thymmai ha surok bah, hynrei bun naki paidbah kila ngat ha shrip ki pulit namar ba ki ñiah kali hapdeng ka jingbuaid lem bad u bilor kyiad kaba dei ka daw bah jong bun ki jingjia aksiden.
Lah ruh ban kdew hangne ba naduh ka jingsdang jong ki pulit haka jinggïalam u heh pulit ka Ri-Bhoi ban sdang talasi ïaki kali ki jingjia aksiden kila hiar arsut ha Ri-Bhoi kaba dei kawei naki jak aba jur bah ka jingjia aksiden bad ka jingïap briew ban pynlong ruh ïa bun ka iing ka sem ban iam briew tang namar ka jingbym burom ïaki aiñ ñiah kali bad ka jingdih buaid.
Hapdeng ka jingtalasi jong ki pulit kawei ka kali sorkar kaba don ïa u number ML 01 B 0202 kala shah bat ha u SSP bad haka jingtalasi la lap ba katei ka kali kam don satia ka jingbit ban tah iit iong bad ban buh siren, ha kaba naka liang u SSP u la phah tar mardor ïaka iit iong bad phah weng ruh ka siren lem bad ka kuna nalor kiwei kiwei ki kali pynkheiñ aiñ.
Kane ka dei ruh ka sien ba khatduh ba u VS Rathore kum u heh pulit ka Ri-Bhoi u mih madan sha surok shuwa ba un mih noh na kane ka district ban leit shimti pat kum u DIG ka Eastern Range.