Dei bym ïatrei lang hapdeng ki tnad sorkar, ba sa bthei u pipe um PHE hajan 101 Area: Adelbert

Shillong, Nohprah 23: U MLA ka 17 North Shillong u Bah Adelbert Nongrum u la ong ba lada don ka jingiatrei lang hapdeng ki tnad sorkar, ki paidbah nong shong shnong ka nongbah Shillong kin ym kynduh jingeh na ka jingbym mih um ha kine ki khyndiat sngi kiba la leit.
Haba ïa kren bad ki lad pathai khubor u Bah Adelbert u la ong, “Lada ka PWD, NHIDCL bad PHE ki la iatreilang bha, kane ka jingjia bthei pipe kan nym jia, bad ki paidbah kin nym hap ban mad ia kane ka jingeh jong ka jingkyrduh um”.
Kum ban shu kdew ba dang shen la bthei u pipi um jong ka tnad PHE hajan ka 101 Area.
U Bah Adelbert u la ong, Kane ka jingjia ka la pynpangnud shisha ïa ki nongshong shnong kiba siew hok ïa ki khajna ne tax jong ki.Halor kane ka mat, ngi la iakren bha bad ki tnad trei kam bapher bapher bad kumjuh ruh bad u myntri ba don bynta.
“Kane ka jingïakynduh jingeh ka dei kaba ki paidbah ki hap ban mad, hynrei ka jingshisha ka long ba ka dei ka jingleh torti jong ka NHIDCL kaba la pynjulor ia u pipe um jong ka Greater Shillong Water Supply Scheme, kaba la pynthud ym tang ïa ka sor Shillong hynrei ïa ka jylla hi baroh kawei” ong u Bah Adelbert.
Shuh shuh u la pynpaw ba ki sngewthuh ba ka sorkar ka dei ban don ia ka polisi kaba shai, khnang ba ki tnad trei kam bapher bapher kin iatreilang.Ka jingthmu jong ki tnad sorkar bapher bapher ka dei ban ai ïa ka jingshakri kaba bha tam ïa u paidbah.Hynrei kumba nga ïohi, ka rukom pynlong lang ne mode of convergence kam shym la don, bad kane ka pynpaw ba ki tnad trei kam bapher bapher ki la ïaid marwei marwei.
Namarkata, Nga kyntu jur ia ka sorkar ba kan pyntikna ba baroh ki tnad sorkar kin don ia ka jingiatreilang, khamtam haba pyntreikam ïa ki scheme kiba kongsan bad kyrpang, khnang ba u paidbah un nym hap ban mad ïa ka jingjynjar kumba la mad da ki paidbah ka sor Shillong ha kane ka por, u la ong.
U Bah Adelbert u la bynrap ruh, Ka sorkar ka dei ban wanrah ïa ka polisi kaba shai ban pyntikna ba ki tnad sorkar bapher bapher kin trei hok ïa la ka jong ka bynta bad, khamtam eh, ba kan don ka rukom pynlong lang.
“Ka long shisha ka jinglyngngoh kaba khraw ba nga hap ban ong ba ka sorkar kaba mynta ka la leh ïa ki katto katne ki kam kiba bakla.Kum u nongmih khmat paidbah, ka dei ka kamram jong nga ban ai ïa ka jingiaroh haba donkam, hynrei ha kajuh ka por, nga hap ruh ban kynthoh pyrshah haba ka sorkar ka bakla” ong u Bah Adelbert.