Bthah ka sorkar ïa ki BSF bad bor Pulit ban pahara pyrkhing ha ki bynta khappud ka Bangladesh

Shillong, Nohprah 23: U Symbud Myntri Rangbah ba khmih ïa ka kam Pohïing (Police) Bah Prestone Tynsong ula pyntip ba ka Sorkar kala bthah ïa ki BSF bad ïa ki Pulit ba kin pynkhlaiñ ïa ka jingpahara ha ki jaka khappud bad ka ri Bangladesh bad ban pynthikna ïa ka jingshngaiñ ki paidbah da kaba ai ïa ka jingïada ba pura.
Kane ka jingbthah kala mih hadien ka jingshah thombor bad shah lute ki 5 ngut ki nongshong shnong ka Umniuh Tmar ha ki nong Bangladesh, kaba la jia ha ka 17 tarik Nohprah.
Ki runar ba Bangladesh kiba rah bad ki wait, kila lute naphang ïa kine ki nong Umniuh Tmar ba kynthup ïa 4 ngut ki Kynthei bad uwei u Rangbah bad kila knieh jubor ïa ki jingdeng sohskhor ksiar, ki mobile phone bad ki tablet.
“Ka long kaba sngewsih ba kum kine ki jingjia kila jia….ngi la bthah ïa ki BSF bad ki Pulit ba kin peitngor bha ha shilynter ka khappud ba jrong kumba 444 Km ba kan don ka jingshngaiñ ïa ki paidbah ba sah ha ki shnong khappud” ula ong.
U Bah Prestone u pyntip ba ka Sorkar kala lum ia ka jingïalang bad u Inspector General ki BSF lem bad ka Director General of Police (DGP)-kaba la ïakren ym tang ïa kaei kaba jia ha Umniuh Tmar hynrei ban pynkhlaiñ ïa ka jingpeitngor ha shilynter ka khappud ba 444 Km.
“Ngi hap ban long kiba husiar bad ba peitngor bha khamtam mynta ba ka jinglong jingman ka suk ka saiñ ha Bangladesh ka long kaba sniew bha” ula ong.
Haba kylli, u Bah Prestone u ïathuh ba ki nong Bangladesh ki ju wan barabor da ki spah ngut ban tuh ïa ki jingthung jingtep bad thombor ïa ki briew ba sah ha khappud. “Ki nong Bangladesh ki da kheiñ jingkheiñ bha bad syntiat bha ban wan leh ïa ki kam runar ha ka por bym don ki shipai BSF” ula ong haba bynrap “Ngim kwah ba kum kine ki jingjia kin dang ïai jia”.
“Ka DGP ryngkat bad u IG ka BSF kila ïakren bad ïaphylliew jingmut bad shimkhia bha halor kane ka kam” pynkut u Bah Prestone.