Mang pisa T. 44 klur tam ban tei ïa ki madan ‘Synthetic Athletic Track’ ha ki 3 tylli ki jaka hapoh ka jylla: kawei ha Shnong Sakwang
Mawkyrwat, Nohprah 22: Ka long kaba pynkmen ïa ki paidbah nongshong shnong kiba dei ki riewieit ïalehkai bad khamtam eh ïa ka shnong Sakwang, South West Khasi Hills District namar kumba ki la ap khmih lynti lah da ki phew phew snem ban ïoh ïa ka madan ïalehkai ba paka bad ba bha, kaba la kular da ka sorkar jylla, ha kaba mynta ka kynti kane ka jingangnud ka la urlong hadien ba ka Sorkar Jylla ka la mang haduh T. 44 klur tam ban tei ïa ki madan ‘Synthetic Athletic Track’ ha ki 3 tylli ki jaka hapoh ka Jylla, kawei ha shnong Sakwang, kawei ha Garo Hills bad kawei pat ha Ribhoi.
U Bah Renikton Lyngdoh Tongkhar MLA ka Mawkyrwat Constituency haba kren ha ki lad pathai khubor hadien ka jingleit jngoh ïa ka shnong Sakwang, u la pynpaw nyngkong eh da ki kyntien jong ka jingkmen ba khraw da kaba ula pynbna paidbah ba ka Sorkar Jylla ka la dep mang pisa kyrpang ban shna ïa ki Madan ialehkai ba paka khamtam eh hapoh ka shnong Sakwang kaba dei kawei na ki shnong ba la ju pynmih bun ki ‘rang bad ki ‘thei ïalehkai kiba la ju wanrah ka nam ka burom ïa ka South West Khasi Hills District, ka Jylla bad wat ïa ka Ri India, bad da kaba ïathuh ruh ba shen yn sa ïoh ban pyntrei noh ïa ka madan hapoh shnong Sakwang.
“Da kane nga khmih lynti ruh ba kan sa long shisha ka jingkyrkhu ïa ki paidbah jong ka dong ka thaiñ Mawkyrwat”, ong u bah Renikton Lyngdoh Tongkhar.
Namarkata, ha ka jingkren jong u, um lah khlem da ai khublei kyrpang ïa ki paidbah jong ka shnong Sakwang baroh kawei kiba la ju long ka kti kamon ka kti kadiang jong ka jingiatreilang ryngkat bad ka Sorkar Jylla khamtam eh u Bah Shainingstar Kharjahrin uba dei u Myntri Shnong Sakwang ha kaba wat ïa ka ITI ruh la ïoh ban shna bad pynïeng ha kane ka shnong.
Haba kren pat na ka bynta na ka bynta ka BIET kaba la sahkut mynta la bun bun snem, u Bah Renikton Lyngdoh Tongkhar ula ïathuh ba ka jingïakren ka dang ïaid shakhmat ban ïoh ïa ka mang pisa ne ‘sanction’ ban tei noh syndon da ka DIET ha katei kajuh hi ka jaka.