Shillong, Nohprah 22: Ka Voice of the People’s Party ka dap da ka jingkyndit kaba khraw hadien ba ka la ïohi ïa ka jingbyrngem jong ka seng HNLC ban pynïap ïa ki nongïalam jong ka seng kumba la mih ha ki lad pathai khubor.
U Nongïalam bad u President ka seng u Bah Ardent Miller Basaiawmoit haba kren sha ki lad pathai khubor lyngba ka Video u la ong ba ka seng ka pynrem jur ïa kane ka jingkren jong ka seng HNLC.
“Kum ka party ngi kwah ban pynrem jur ïa kane ka jingbyrngem jong ka HNLC bad ngi kwah ruh ban ong ba dei u paidbah uba la jied ïa ka VPP ban synshar ha KHADC bad kumta ka HNLC kam don hok ban tuklar ïa ka jingsynshar jong ka VPP bad dei tang u paidbah uba lah ban bret ïa ka VPP na KHADC bad lada ki shem ba ka jingtreikam jong ngi ka la long pyrshah ïa kaei kaba la kular,” ong u Bah Ardent.
U la ong ba seng ka kwah ruh ban ong ba ki don shibun ki jingkulmar ha ki kam synshar Hima bad kumba ka long ki don shibun ki kynrum ki kynram hapoh ka Hima Sohra bad ki jingtreikam hapoh ka Hima Sohra.
“Ka VPP kaba don ka jingthmu ban wanrah ïa ka synshar khaddar kaba khuid kaba suba ha ki Hima sima bad ka jylla baroh kawei bad naba kadei ka party kaba peit ïa ka bha ka miat jong ki nongshong shnong bad kumta na ka liang jong ka seng kam kwah ban leh kyrkieh ne rai kyrkieh ha kaba ïadei bad ki kam synshar ha ki Hima ne ki shnong ki thaw namar ka thong jong ka VPP ka dei ban wanrah ïa ka synshar kaba khuid ha ka jylla baroh kawei,” ong u Nongïalam ka VPP.
U la ong ba ka seng ka sngewthuh ïa kaei kaba dei ban leh bad ban leh ïa kaei kaba dei ban leh kum ka party.
“Nga kwah ruh ban ong ba ka jingbyrngem ban pynïap jong ka HNLC ïa nga ne ïa ki nongïalam jong ka party kan wanrah ka jingshong suk shong shngaiñ na ka bynta ka jaitbynriew, nga long uba kloi ban long u langknia na ka bynta ka jingmyntoi jong ka jaitbynriew. Nga kwah ruh ban ong ba kane ka jingbyrngem jong ka HNLC kan long ka kabu kaba khraw ïa kito kiba don ka jingthmu kaba sniew ïa ki nongïalam jong ka party bad kumta ka HNLC kan ym lah ban lait na ka jingkitkhlieh ne ban sait khuid ïalade lada ka wan kano kano ka jingjia ïa ngi ki nongïalam jong ka party,” ong u Bah Ardent.
U la ong ruh ba da kane ka jingbyrngem jong ka HNLC un ym wad ïa ki lad jingïada na ki bor jong ki pulit. “Nga tip ba ka jingïap bad ka jingim jong nga ka shong ha U Blei namar ngim don kano kano ka jingthmu kaba sniew pyrshah ïa ka jaitbynriew namar ngi angnud ban wanrah ïa kaba bha na ka bynta ka jaitbynriew bad na ka bynta ka lawei kaba sngaiñ ïa ki longdien ki mandien bad nga don shibun ki jingkylli ïa ka seng HNLC hynrei ngam kwah ban kylli ha kane ka por.”
U nongïalam ka VPP u la buh ka jingkylli ïa ka seng HNLC da kaba ong, “Kaei ka jingkwah jong ka seng HNLC. Hato ka HNLC ka kwah ban pynphai biang ïa ka synshar syiem ha kane ka jylla jong ngi, ne ba ka HNLC ka kwah ba ngin lait noh na ka Ri India, bad kine ki long ki jingkylli kiba ka HNLC ka hap ban batai shai sha ngi u paidbah, nga kyntu ïa ki paidbah ba kim dei ban rit mynsiem bad kim dei ban artatien ïa ki nongïalam jong ka party naba ki la mad ïa ki jingeh kiba bun bad ki jingshah byrngem ha ki por kiba mynshwa bad ngin ym kynran dien ban ïaid ha ka lynti kaba beit naba ïa ka seng la thaw ban trei na ka bynta ka bha ka miat jong ki paidbah.”
