Bad ki paidbah ka thaiñ Killing, rakhe Pre-Christmas ka skulbah USTM, pynkup burom ïaki samla pule bad nongïalam

Nongpoh, Nohprah 21: Nalor ka jingshakri kum kawei naki shlem hikai ka skulbah University of Science and Technology Meghalaya hynnin ka sngi Saitjaiñ kala rakhe ïaka Pre-Christmas Village Community Programme haka shnong Jorbil, Greater Killing da kaba pynkup burom ruh ïaki nongïalam shnong kiba la don bynta ban shakri ïaka imlang ka sahlang, ki samla pule kiba pass bha haki jingpule bad ka jingsam jaiñ kup syaid sha ki longiing ba duk bad ki riew tymmen ha katei ka thaiñ.
Ha katei ka jinglehkmen la sakhi ruh da ka jingdonlang u Lou Majaw uwei naki nongrwai ba pawnam ka jylla u ba la tip ruh kum u Bob Dylan of Northeast, u Mahbubul Hoque Chancellor ka USTM, ki nongïalam shnong, namar katei ka skulbah ka kiew ruh dei namar ka jingtreilang jong ki nongïalam shnong.
Shuh shuh ha katei ka sngi naka liang ka PIMC jong ka skulbah USTM kala pynlong ruh ka jingsumar ei ïaki paidbah bad ka jingsam ïaki Digital Health Card.
Naka liang ki nongïalam shnong haba kren ha katei ka sngi kila ai ka jingïaroh ïaka skulbah USTM kaba la bteng ban leh ki kam ba bha sha ka imlang ka sahlang bad lyngba katei ka prokram ka long ruh kum ka jingkieng hapdeng ka pule ka puthi bad ka imlang ka sahlang.