Kem ki pulit EJHD ar ngut ki briew kiba suba donkti pynbthei bom ha Shymplong ha jaka ka Dhar Company
Khliehriat Nohprah 21: Ka kyrwoh khubor ba la phah da u Superintendent of Police East Jaiñtia Hills District ka iathuh ba ki pulit ki la kem noh ïa ki ar ngut ki briew ba la tip kyrteng kum u Richard Suchen, 31 snem kyrta bad u Pynshaitbor Syih,45 snem kyrta kiba na shnong Shymplong, East Jaiñtia Hills District ha kaba la kynnoh don kti ha ka jingpynbthei bom ha ka jaka jong ka Dhar Company ha Shymplong East Jaiñtia Hills District.
La ong ruh ba katkum ka ejahar ba la ioh pdiang ha Lumshnong Police Station myn ha ka 16 tarik u nohprah ka pynpaw ba ha ka step synia jong ka 15 tarik ha ka por kumba 12.15 baje ka la don ka jingpynbthei bom ha kawei ka jaka jong ka Dhar Company ha shong Shymplong bad shem ba la pynbthei da ki bom IED ha kaba kawei ka kali kaba dei ka trok kit um jong ka Dkhar Company ha kaba ka kali ka la julor hynrei ym shym la don pat kano kano ka jingjia mynsaw ha katei ka jingpynbthei bom, te halor kane ïa ka ejahar ka register ha Lumshnong Police Station hapoh ki kyndon 109(1)/113(1)/113(2)/113(3)/326(f)/327(2) jong ka BNS bad ki kyndon jong ka Explosive Substances Act.
Shuh shuh hadien ba la tohkit ïa kitei ki ar ngut kiba la shah kem, la lap ksai shuh shuh ba la don donkti ruh ki ar ngut ba la tip kum u Issei Sungoh uba na Khliehriat bad u Smiki Tongper uba na Shymplong kiba la iasylla lang ban pynbthei ïa utei u bom ha ryngkat bad ki arngut kiba la shah kem.
Ki khubor pulit ki iathuh shuh shuh ba u Smiki Tongper u dei uba la lamkhmat ha kaba iadei bad katei ka jingpynbthei bom ha Shymplong, u dei ruh uba la shah thwet ha ki pulit halor kawei pat ka ejahar ba ka register hapoh ka POCSO Act, (Khliehriat Woman PS case no 45(09)23 u/s 376(3)IPC R/W 3(a)/4 POCSO Act ) bad u dei ruh u dkhot jong ka seng kieng atiar ba la keiñ beaiñ, ka Hynniewtrep National Liberation Council (HNLC) bad u Issei Sungoh pat u dei uba la shah thwet halor ka jingpynbthei bom IED kaba la jia ha Police Reserve ha Khliehriat myn ha u snem 2023 bad u donkti ruh sa ha kiwei pat ki kam bymman, ong u kyrwoh na u Superintendent of Police, Vikash Kumar, IPS.
La ong ruh ba ha ka jingleit khynra ki pulit ïa ka ïing kaba dei ka jaka sah jong u Smiki Tongper ki pulit ki la lap bun tylli ki tiar shna bom bad kiwei kiwei ruh ki jait tiar ba kynthup 3 roll ki safety fuse bad 2 tylli ki safety fuse barit, 3 tylli ki detonator, ki bakhor, 82 tylli ki splinter, kawei ka suloi shna hi, 82 tylli ki splinter barit, artylli ki handset bad 5 tylli ki fuse , ki Gun Powder bad ki pulit ki la kurup noh ia kine ki tiar.
Na ka liang u SP u buh ka jingkyrpad ïa baroh ki riew paidbah ban ai jingtip lem sha ki bor pulit lada ki don jingtip ha kaba iadei bad kiwei pat ki runar kiba donkti ha katei ka kam pyntriem bad u pynthikna ruh ban buhrieh ia ki kyrteng jong kiba ai jingtip ban yn ai khusnam ruh ïa ki.