Nongpoh, Nohprah 21: Ka tnad Pulit na Ri Bhoi ha ka jingïalam u Senior Superintendent of Police, u Vivekanand Singh Rathore lem bad ka kynhun Pulit ki ophisar ha ka janmiet jong ka sngi Thohdieng ki la pynlong lypa ïa ka jingrakhe ïa ka jingwan long briew u Jisu Khrist sha ka pyrthei lane kata ka Advance Christmas ryngkat ki khunswet kynthei bad shynrang kiba la ri la sumar ha ka jingpeit jingkhmih ka tnad Social Welfare na Ri Bhoi District.
Ïa kane ka jingrakhe ïa ka Advance Christmas bad snem thymmai la pynlong ha phyla ka ophis treikam u Superintendent of Police ka Ri Bhoi District bad la wan ai mynsiem ruh da ka jingdon ang u Bah Paul Lyngdoh myntri sorkar barim ka jylla, u Deputy Commissioner ka Ri Bhoi u Abhilash Baranwal, ki Magistrate, ki nongïalam seng bhalang ba kynthup ïa u Bah Bipul Thangkhiew President ka RBYF, u Bah Ferdynald Kharkamni, President ka KSU, u Bah Rayonald Kharkamni, Honorary Secretary ka MCA nalor kiwei kiwei de ki heh pulit na ka District.
Nalor ka jinglehkmen kitei ki khunswet kynthei bad shynrang lynga ki jingrwai bad ka put ka tem, la pynshongshit ruh ha kane ka janmiet da ka jingot Cake da ki khunswet kynthei bad shynrang bad bud pat sa ka jingrwai na u Bah Paul Lyngdoh lem bad kiwei kiwei ki nongwai.
Haba kren ha kane ka jingleh kmen Christmas bad snem thymmai, u Bah Paul Lyngdoh kum u myntri sorkar barim bad u MLA, u la ai ka jingïaroh ïa ka tnad Pulit na Ri Bhoi, kiba la shim ïa kane ka sienjam ban lehkmen Christmas bad snem thymmai bad ki khunswet, kaba da long shisha ka jingai mynsiem bad ka jingkmen ïa ki khunswet kynthei bad shynrang ban ioh ban ïa lehkmen na ka bynta ban pdiang ïa ka Christmas bad snem thymmai.
Ha kawei kawei ka bynta, u Bah Paul Lyngdoh u la ai ruh ka jingïaroh ïa ka tnad Pulit na Ri Bhoil, kiba la shim khia bha ban ïakhun pyrshah ïa ki Kali ba pynkheiñ aiñ bad da ka jingïakhun pyrshah ki Pulit ban tem ïa ki Kali ba pynkheiñ aiñ kane kan ïarap shibun na ka bynta ka jingshngaiñ jong ki paidbah Nongleit nongwan lyngba kane ka surokbah ha Ri Bhoi District.
Shuh shuh, u la ai mynsiem ruh ïa ka tnad Pulit ba kan dang trei shitom ha kaba ïa khun pyrshah ïa baroh ki kam sniew kiba don ha ka imlang ka sahlang bad kyntu ruh ba kin dang trei shitom na ka bynta ban pynneh ïa ka shongsuk shongsain ki paidbah khnang ba kin dang lah ban kiew shaphrang ha baroh ki liang jong ka jingim, u la bynrap.
