Ot ribon u ma Gresentus Susngi kum ka jingsdang kamai

Jowai, Nohprah 20 : Ka Local Taxi Nangbah Unit ha ryngkat ka Santa Jaiñtia Groups kum ka dak ban rakhe ïa ka Christmas mynta u snem kan lehkmen sngewbha da kaba kamai ei (khlem jingsiew dor) ar sngi ha sor Jowai naduh mynta ka sngi saitjaiñ (Saturday) 20 tarik bad ka sngi Monday 22 tarik u Nohprah, 2025.
Ïa kane ka jingsdang kamai ei la wan ot ribon da u ma Gresentus Susngi, MDC JHADC ha kaba la don 6 tylli ki local taxi ki ban kammai ei ha kaba ki nongñiah kin phong lang da ki riam Santa Claus bad la tad da ki poster ïa ki kali kamai kaba ong “chong wa nga ym boi poisa”.
Kine ki local taxi kin pdiang sngewbha ïa ki paidbah nongleit nongwan sha ki ïew ki hat hapoh ka West Jaiñtia Hills bad ban kit khlem kano kano ka jingsiew ha kine ki ar sngi.
U President ka seng ula ong ngi pynpaw ka jingshngewkmen ban pdiang ïa kane ka Christmas da kaba kamai ei 2 sngi ïa ki paidbah, da kaba u ong haka shisnem la don 365 sngi, kumta da kawei ka jingmut ngi kwah ban leh ïa kane ar sngi da ka mon sngewbha.
U MDC ka 17-Nangbah Mihmyntdu u Gresentus Susngi ha ka jingkren ula ong ïa ka Christmas la lehkmen ha kylleng ka pyrthei bad ki don la ki jong ki jong ki rukom rakhe, kumta na ka liang ka Local Taxi Nangbah Unit kila pynbeit ban rakhe da kaba kamai ei ar sngi na ka bynta ki paidbah.
U la pynkymmaw ïa u Santa Claus la sdang ïa u naduh ka snem ba 400 lyngba u Saint Nicholas bad ka kam jong u Santa Claus ban leit ai sngewbha sha kiba duh ba duk bad ban ai jingkmen hashwa ka Christmas, kane ruh ka long kum ka jingai sngewbha jong ki nongñiah kali kamai sha ki nongleit nongwan kiba leit ïew leit hat, haka juh ka por ula ai khublei Christmas bad snem thymmai ba suk ba kmen ïa baroh.