Mih pyrthei ki mar rep bad ki jingri jingdup ki nongrep ha ka ïew pyninam ka HFU ha Liarkhla
Nongpoh, Nohprah 20 : Kum kawei na ka thong ban ailad ïa ki nongrep ba kin ioh lad ban pynïaid iew ïa ki mar rep tynrai ba ki rep ki riang na ka bynta ban kyrshan ïa ka ing ka sem lyngba ka kam rep, ka Hills Farmer Union, Raid Ïapngar Cicle mynta ka sngi ka la pynlong da kawei na ka ïew pyninam ba la tip kum ka Raid Ïapngar Famers Indigenous Market ba la pynlong ha Madan Liarkhla hapoh ka Raid Ïapngar ha Ri Bhoi District.
Ha kane ka jingpyni nam ne ban pynïaid iew ïa ki mar rep la wan ban shim bynta shitrhem da ki nongrep ka thaiñ Raid Ïangar ha ryngkat ka jingpyni nam bad die ïa ki mar rep kiba bun jaid, kaba long shi bynta ban kyntiew ïa ka ioh ka kot ki nongrep.
La wan ruh ban plie paidbah ïa kane ka ïew pyni nam ïa ki mar rep da u MDC ka Umroi u Bah Isynei Hinge kum u kongsan bad la sakhi lang ruh da ka jingdon lang u Dr Mokidul Islam, Principal Scientist ka KVK Ri Bhoi kum u symbud kongsan.
Kiwei kiwei kiba la ïa don lang ki kynthup ïa ka kong M Marina Dkhar, Joint Managing Director, ka Directorate of Agriculture, u Bah Alfondbirth Kharsyntiew General Secretary ka Hills Farmer Union central body, ki dkhot bad ki nongïalam ka Raid Ïapngar, ki rangbah shnong, ki nongshong shnong, ki riew paitbah bad kyrpang eh ki nongrep na kylleng ka Raid Ïapngar.
Haba ai jingkren hakane k asngi, u bah Alfondbirth Kharsyntiew General Secretary ka Hills Farmer Union Central Body u la pynkynmaw ba ki Nongrep ha ka jylla Meghalaya haduh mynta ki dang lah ban pynbiang ïa ki mar bam mar dih bad ki mar rep tang kumba 30% bad 70% ngi dang hap ban shaniah na kiwei ki jylla ka Ri.
Haba kren ruh ha kane ka sngi kum u kongsan, u Bah Isynei Hinge, u la pynpaw ïa ka mynsiem jingsngewsarong na ka bynta ki nongrep bad u la ai mynsiem ruh ïa ka HFU ba kan dang lah ban trei kham bha da kaba kular ruh ïa ka jingïakyrshan lem ban kyntiew ïa ki nongrep katei ka thaiñ.
Lyngba jong kane ka sngi, la wan shim bynta ruh da ki riew shemphang ha ka kam rep ka kam riang bad ki la pynlong ruh ïa ka jingbishar ïa ki mar rep bad ki jingri jong ki nongrep bad bud ruh sa ka jingsam ïa ki khusnam sha kito ki nongrep kiba ioh khur ïa ka nam jop ha kane ka jingpyni nam ïa ki mar rep bad ki jingri hapoh ka Raid Ïapngar.