New Delhi, Nohprah 20: U Myntri Rangbahduh ka ri u Narendra Modi un sdang ïa ka jingleit jngoh sha Assam ha ka 20-21 tarik u Nohprah. Ha ka 20 tarik u Nohprah, ha ka por kumba 3 baje janmiet eiei, u Myntri Rangbahduh un poi ha Guwahati, ha kaba un leit jngoh bad plie ïa ka Terminal Building ba thymmai jong ka Lokapriya Gopinath Bardoloi International Airport. Un ai jingkren ruh ha ka jingïalang ha katei ka sngi.
Ha ka 21 tarik u Nohprah, ha ka por kumba 9:45 baje mynstep, u Myntri Rangbahduh un ai burom ïa ki riewshlur ha Swahid Smarak Kshetra ha Boragaon, Guwahati. Hadien kane un leit sha Namrup kaba don ha Dibrugarh, Assam, ha kaba un leh Bhoomi Pujan na ka bynta ka projek Ammonia-Urea jong ka Assam Valley Fertilizer and Chemical Company Ltd. Un ai jingkren ruh ha ka jingïalang ha katei ka sngi.
Ha ka 20 tarik u Nohprah, u Myntri Rangbahduh un plie ïa ka terminal building ba thymmai jong ka Lokapriya Gopinath Bardoloi International Airport ha Guwahati, kaba long ka dak jong ka jingkylla ha ka jingïasoh jong ka Assam, ka jingpynïar ïa ka ïoh ka kot bad ka jingïadei bad ka pyrthei baroh kawei.
Kane ka Integrated New Terminal Building kaba dang shu dep shen, kaba don ha ka jaka kaba jan 1.4 lak square metre, la shna khnang ban lah ban pdiang haduh 1.3 klur ngut ki nongleit nongwan ha ka shisnem, la kyrshan da ki jingpynbha ba kongsan ha ka runway, ki lynti pynher liengsuiñ, ki rukom treikam ha ki jaka pynher liengsuiñ, ki rud lynti pynher liengsuiñ bad ki jaka pynïaid ki liengsuiñ.
Ka kad liengsuiñ ba nyngkong eh jong ka India kaba ïadei bad ka mariang, ka jingshna ïa ka kad liengsuiñ ka ïoh mynsiem na ki jingdon jingem bad ka kolshor jong ka Assam hapoh ka phang “Bamboo Orchids”. Ka jaka buh liengsuiñ ka pyndonkam nyngkong eh ïa kumba 140 metric ton ki siej ba la wanrah na ka thaiñ shateilam mihngi, ba la dap da ki jingdro ba jyrngam ba don nongrim ha ka Kaziranga, ki japi motif, ka dak jong u kyndat ba pawnam bad 57 tylli ki païa ba la shna kaba ïoh mynsiem na ki taïew orchid kiba pynpaw ïa u syntiew Kopou. Ka “Sky Forest” kaba kyrpang, kaba don haduh shi lak tylli ki jingthung jong ki jait jingthung kiba ïoh hapoh ka thaiñ, ka ai ïa ki nongleit nongwan kiba poi ïa ka jingshem kaba jylliew, kaba long kum ka khlaw.
Ka jaka ap liengsuiñ ka buh ïa ki kyndon kiba thymmai ha ka jingsuk jong ki nongleit nongwan bad ka jingsaiñdur thymmai ha ki kam digital. Ki jingdonkam kum ki scanner ba pura ïa ka met briew na ka bynta ka jingpeit bniah kaba stet, ka screening kaba suk, ka leit ka wan kaba suk kaba pyndonkam da ka Digi Yatra, ka jingpynïaid ïa ki mar ki mata da ki kor, ka jingwan buhai shnong kaba stet bad ki jingtreikam jong ka kad liengsuiñ ba la pynïaid da ka AI ki pynthikna ïa ki lad ka leit ka wan kiba suk, kiba shngaiñ bad kiba thikna.
Ha ka step 21 tarik Nohprah shwa ban leit sha Namrup, u Myntri Rangbahduh un leit jngoh ruh ïa ka Swahid Smarak Kshetra ban ai burom ïa ki riewshlur jong ka Assam Movement ba pawnam, ka jingïakhih jong ki paidbah kaba la neh hynriew snem bad kaba la pynpaw ïa ka jingkut jingmut lang na ka bynta ka jylla Assam kaba lait na ki nongwei bad ban ïada ïa jinglong tynrai jong ka Assam.
Hadien kane, u Myntri Rangbah duh un pynlong Bhoomipujan ïa ka projek Ammonia-Urea Fertilizer ba thymmai ha Namrup, ha Dibrugarh, Assam, hapoh ka jaka ba la don lypa jong ka Brahmaputra Valley Fertilizer Corporation Limited (BVFCL).
Ka jingkyntiew ïa ka jingthmu jong u Myntri Rangbahduh shaphang ka bha ka miat jong ki nongrep, ka projek, kaba la antad ba kan bei tyngka palat T. 10,600 klur, kan pynbiang ïa ka jingdonkam sboh jong ka Assam bad ki jylla ba marjan, kan pynduna ïa ka jingshaniah ha ki mar kiba wan nabar, kan pynmih ïa ki lad ïoh kam kiba bun bad kan kyntiew ïa ka ïoh ka kot ha ka thaiñ. Ka ïeng kum u mawjam jong ka jingpynkylladur ïa ki karkhana bad ka bha ka miat jong ki nongrep.
