Ka rukom pynïadei jong u Modi kaba ym pat ju ïohi: San na ki 6 tylli ki ri GCC ki ai ka burom kaba halor tam ïa u Modi

New Delhi, Nohprah 20: Ka jingïadei jong ka India bad ka thaiñ Gulf ka la mad ïa ka jingkylla kaba khraw ha kine ki shiphew snem ba la dep, kaba don ïa ka dak kaba shai jong ka jingïadei shimet jong u Myntri Rangbahduh Narendra Modi. Kaei kaba ka New Delhi ka la ïoh ha ka thaiñ West Asia naduh u snem 2014 ka long kaba ym pat ju jia ha ka histori jong ka jingïadei jong ka India bad ka Gulf.
Ka jingïatreilang ka la nang kiew na ka jingshaniah ba mynshuwa ha ki hydrocarbon bad ki nongtrei jong ka ri India, da kaba pynkylla ïa ka sha ka jingïadei kaba kham thikna, kaba la pynskhem bad kaba don jingshaniah ha ka saiñ pyrthei. Ka jingleit jngoh jong u Myntri Rangbahduh Modi 15 sien ïa ki ri jong ka GCC (Gulf Cooperation Council), kaba long kaba bun tam da uno uno u myntri rangbahduh ka ri India, ka la wanrah ïa ka jingïajan kaba ki sorkar kiba mynshuwa kim shym la lah satia ban wanrah. Ka GCC hi, kaba kynthup ïa hynriew tylli ki ri Arab, ka dang long kawei na ki kynhun ba kongsan tam ha ka thaiñ, kaba pynwandur ïa ka jinglong jingman jong ka ïoh ka kot bad ka saiñ pyrthei jong ka West Asia.
Ka dak jong kane ka jingshaniah kaba thymmai ka la wan lyngba ki jingpynkup burom ba halor duh na ka bynta ki riew paidbah jong ka thaiñ. San na ki hynriew tylli ki ri thaiñ Gulf, ki la ai khusnam ba halor duh mynta ïa u Myntri Rangbahduh Modi, ha kaba ka Oman, ka la rung ha katei ka thup, ha ka taïew ba ladep, haba ka la ai ïa ka khusnam Order of Oman.
Kane ka wan hadien ba ka UAE ka la ai ïa ka Order of Zayed ha u snem 2019, ka King Abdulaziz Sash jong ka Saudi Arabia ha u snem 2016, ka khusnam King Hamad Order of the Renaissance (First Class) jong ka Bahrain ha u snem 2019 bad ka Order of Mubarak Al-Kabeer jong ka Kuwait ha u snem 2024.
Ym tang ki jingpyndep rukom
Kaba kongsan ka long ba kine ki jingpynkup burom kim dei ki jingpyndep rukom. Ha ka thaiñ ha kaba kum kine ki jingpynkup burom la buh kyrpang na ka bynta kito ki nongïalam kiba long kiba lah ban shaniah, kiba kongsan ha ka liang ka buit treikam, ki jingpynkup burom ki pyni ïa ka jingshaniah kaba jylliew kaba kyrpang bha.
U Myntri Rangbahduh Modi u dei u nongïalam ba nyngkong eh ha ka pyrthei ban ïoh ïa ki khusnam ba ha khlieh duh na ki san tylli ki ri ka thaiñ GCC, ka khubor saiñ hima sima ka bym dei tang ka jingpyndep rukom hynrei kaba pyni ïa ka jingshaniah ka thaiñ Gulf ïa ka jinglong nongïalam jong u bad ka jingkiew ka kyrdan jong ka India.
Kane ka long kaba kongsan khamtam haba kheiñ ïa ki jingkhmih lynti kiba la don shwa u snem 2014. Bun ki riewshemphang ki ngeit ba ka West Asia ka lah ban long ka jaka kaba eh na ka bynta u Myntri Rangbahduh Modi, da kaba kdew ïa ki jingïashun hapoh ka thaiñ bad ki jingeh jong ka saiñ hima sima jong ka.
Hynrei, u la tei ïa ki jingïahap jingmut jong u ha kylleng ki nongbah jong ka thaiñ Gulf, da kaba wanrah ïa ka jingjop ha ka liang ka jingïadei kaba kiwei kiwei ki myntri rangbah duh jong ka ri India kim shym la lah ban pynurlong ha ki por ba la dep.
Bun kiba ong ba ka jingïadei jong u bad u President ka UAE, u Sheikh Mohammed bin Zayed Al Nahyan, ka long kaba sngewtynnad bad kaba don tynrai ha ka jingshaniah mar kylliang. Ka jingïakren jong u bad u Syiem Saudi Salman bin Abdulaziz ka la plie lad ïa ka jingïasoh lang ha ki buit treikam. U syiem jong ka Bahrain, Hamad bin Isa Al Khalifa, U Amir Sheikh Meshal Al-Ahmad Al-Jaber Al-Sabah jong ka Kuwait, u Sultan Haitham bin Tariq jong ka Oman bad u Emir Sheikh Tamim bin Hamad Al Thani jong ka Qatar ki la jubab da ka jinglong kaba plie lad bad ka rukom kaba kham niar ban ïoh ki nongïalam na kiwei kiwei ki ri.
Ka jingjop ba kyrpang jong u Myntri Rangbahduh Modi
Ha kylleng ka Gulf, ka jingseisoh ka long kaba shai: U Myntri Rangbahduh Modi u la ïoh ïa ka jingjop kaba phylla. Ki khusnam ba heh tam na ka bynta ki riewpaidbah ki pynskhem ïa ki jingkylla kiba la paw lypa ha ka jinglong jingman jong ka thaiñ. Ka jingsngew ba ka India ka dei ka paralok kaba skhem, kaba lah ban shaniah bad kaba donkam eh ka dang kiew ha ka thaiñ Gulf, khamtam haba ka thaiñ ka wad ïa ki lad thymmai ha ka ïoh ka kot, ka jingïatylli ha ki kam digital, ka jingïatreilang ha ka bor ding ba lah ban pynthymmai bad ka jingïahap ha ka kam saiñ hima sima.
Kane kam dei ka kam kaba tang shipor jong ka jingïadei hynrei ka jingpynbeit thymmai ïa ka jinglong jingman. Ka jingpeit jong ka thaiñ Gulf sha ka thaiñ mihngi mynta ka shem ïa ka India ym ha ki jaka khappud hynrei ha pdeng jong ka jingpyrkhat kaba jrong jong ka. Hapoh u Modi, ka India ka la kiew na ka jinglong paralok ha ka jingïadei sha ka jinglong ka bor saiñdur ïa ka lawei ba kongsan jong ka thaiñ, ka jingkylla kaba ym pat jujia shisha mynno mynno ruh ha ka jingïadei jong ka India bad ka West Asia.