Dih sha step u Conrad ryngkatlang bad ki khynnah ba pynkhuid ïa ki surok sor ha ïingsah jong u
Shillong, Nohprah 19: Ka long shisha ka jingkmen ba khraw ïa ki nongtrei jong ka Shillong Municipal Board (SMB) khamtam eh kito kiba ju pynkhuid ia ki surok bad ki lynti ba kin ïoh rung shapoh ka jaka sah jong u Myntri Rangbah jong ka jylla.
Mynta ka step, kine ki khynnah kiba ju trei ban pynkhuid ia ka sor Shillong kila ioh ïa ka lad ban ioh rung ha ka jaka u Myntri Rangbah u Conrad K Sangma, ha Bivar Road Polo Hills.
Ha kane ka sngi kine ki khynnah kila ioh ruh ia ka lad ban ia dih sha step lang bad u Conrad K Sangma bad haba iohi ia kine ki khynnah ki da dap shisha ia ka jingkmen bad la iohi ruh ba ki ïa shon dur lang bad u.
Kane ka jingïa kynduh jong ki ïa u Myntri Rangbah ka long ruh kum shi bynta ban leh kmen ia ka Christmas.
U Conrad K Sangma u la post ha ka sla facebook jong u da kaba u la ong. Ka long shisha kaba kit jingmut shi katdei ha shwa ban pynkut noh ïa une u snem, da kaba ngi ïa dih sha step lang ryngkat bad ki briew kiba trei smat ïa la ka kam hynrei bunsien ym ju don ki ban ithuh ïa kine ki nongtrei ka Shillong Municipal Board.
” Kine ki kynthei bad shynrang ki long shisha kiba phylla namar jar jar hala kam ki im sngi jar jar ban ri bad sumar da kaba ki pynkhuid ïa ka sorbar kaba bunsien ngim ju iohi, hynrei ki don beit” ong u Conrad.
Nga kynmaw, katba nga dang leit phai sha la iing ha kawei ka janmiet bad nga la ïohi ia ki ba ki dang pynkhuid hajan ka Ward’s Lake.Nga la sangeh ban iakynduh ia ki, bad ha kata ka khyllipmat nga la sngewthuh haduh katno ngi sngewtynnad ba ki surok bad ki sawdong sawkun ki khuid khlem da ithuh satia ia ki kti kiba pynlong ïa kata. Kane ka la long ka jingbam step kaba kyrpang bha ka por ba ka aïom Krismas kala sdang, ong u Conrad
Shuh shuh u Conrad u la ong, Katba ngi dang rakhe ïa ka Khristmas bad pdiang sngewbha ïa u snem thymmai, to ngin sangeh da ka jingsngewnguh ha ki dohnud jong ngi, to ngin burom ia ka burom jong ki, bad to ngin iaid ryngkat bad ki ha ka ban sumar ia ka nongbah ba itynnad jong ngi.