Ha U Blei kam don kano kano ruh ka bym lah ban long ha kane ka pyrthei, ong u Rev (Dr) R R Cunville

Shillong, Nohprah: Kum shi bynta ban rakhe ia ka sngi Khristmas, ki nongtrei ka KJP Assembly ki la pynlong ïa ka Christmas Advance Service 2025 ha ka Sngi Thohdieng haba la wan ban ïashimbynta naduh ki pastor, ki tymmen basan bad ki paid riewngeit kiba bun ngut jong ka Balang Prebyterian kiba la ïalum lang hakhmat jong ka ophis ka KJP Assembly ban ïaroh pyndonburom ïa U Blei bad ia U Jisu Khrist.
Ha kane ka sngi la ïoh ka khubor Christmas na u Rev R R Cunville ha kaba u la ong ba ym don kano kano ka bym lah ban long hakhmat jong U Blei bad kyntu ïa ki paid riewngeit bad ki khun jong ka Balang ba kin shaniah tylli ha U Blei.
U Rev Cunville u la ong ruh ba ha kane ka pyrthei kaba mynta ka dap tang da ki kynrum kynram suda bad donkam ban phai sha U Blei ba un ïarap khnang ba kaei kaei kaba la sngew ba kam lah ban long, U Blei un ïarap ban pynlong ïa kata.
U la ong ruh ban shim ïa ka khubor jong ka jingrakhe ïa ka Christmas da kaba buh hakhmat ïa ka ktien U Blei ba kam don kano kano ruh ka bym lah ban long hakhmat U Blei.
U la ong ruh ba lada U Blei u kwah ban leh eiei ïa ki briew un leh ïa kata kaba ka jingstad pyrthei kam lah ban leh da kumno kumno ruh.
Ha kane ka prokram na ka liang jong u, u la kyntu ïa ki khun jong ka Balang ba lada ki mad ïa kino kino ki jingeh ba kin phai sha U Blei bad khlem pep un ïarap naba kam don kano kano ka bym lah ban long hakhmat jong U Blei.
La pynïaid ïa ka prokram da u Rev. M Shylla Senior Administrative Secretary, ka jingpule na ka Old Testament da u Bah E B Nongrang, jingpule na ka New Testament Kong Banrisha D Kharshiing, jingduwai Bah H T Wells Sten Superintendent, ka jingrwai kyrpang na ki staff ka Assembly bad Samla Carubiangki W Lyngkhoi and Friends, jingduwai kyrkhu pynwai Rev S Diengngan Administrative Secretary bad Rev. A I Kharshiing nalor kiwei kiwei pat ki prokram kiba la pynshongkun ïa kane ka sngi jong ka jingpyndonburom ïa U Blei.