Shillong, Nohprah 19: Ka jingap khmih lynti baroh ka la poi noh sha kaba kut hadien ba ka Meghalaya ka la shah pynliem hakhmat ka Sikkim da 2-1, ha ka jingïalehkai ba nyngkong jong ka Group E Senior Men’s National Football Championship na ka bynta ka Santosh Trophy 2025-26 (preliminary round), ba la long ha madan jong ka SSA Stadium, First Ground, Polo hynne ka janmiet.
Haba phai sha ka jingïakhun, ka stadium ka la khie im hadien ba u kapten ka Meghalaya u Hardy Cliff Nongbri, u la lam khmat ïa ka kynhun ban thep ïa ka shi kol ha ka minit kaba 19.
Pynban hadien ba la shah thep kane ka shi kol, ka Sikkim, kam shim la randien, ka la ïeng ba kan ïakhun tyngeh bad ruh ban ïai ap ïa ka kabu lano ba maka ruh kan ïoh lem ïa la ka jong ka kabu ban pynphai ïa kane ka shi kol ba ka la shah tam, kaba haduh ba kut jong ka kylla step, ka Meghalaya da ka jingkmen ka la lah shwa ban ïai lamkhmat da kane ka shi kol.
Haba wan ban bteng ïa ka kylla miet, ka Sikkim, ka la kyntiew ïa la ka rukom ïalehkai ka jong ka, ha kaba kynsan kynsan ka la lah syndon ban ïoh ba kan thep ar kol, ha kaba ka kol kaba nyngkong la khyrwit ïa ka da u Boxer Pradhan (68′) bad ïa ka kol kaba ar la thep da u Surag Chettri (71′).
Haba phai bad khmih sha ka kynhun ïalehkai jong ka Meghalayta, ba coach ïa ka da u bah Khlain Pyrkhat Syiemlieh, lah ban ong ba kam dei satïa ba kan mad ïa kane ka namrem, ha kaba ki player ba la jied ha kane ka kynti, dei shisha ki rang ïalehkai kiba tbit bad ba da kynsai bha.
Pynban ka jingdon kum kine ki player ha kane ka kynhun, lah ban ong ba ka shu long shisha tang ha ka sla kot jingthoh, hynrei ha madan, kum ka kynhun, ka Meghalaya ha kane ka jingïakhun bad ka Sikkim, ka da dum shisha katta ka buit ka bor ïalehkai ka jong ki, katno tam lei lei ba kam don satïa katta ka jinglah ban ïa mir jingmut bha hapdeng ki player, bynrap da ka jingbym lah ban ïa pynbuh ne ban ïa pashat bha ïa ka bol, kaba ka nuksa jong kane ka dei ka jingshah thep ka kol kaba ar.
Ha ka kylla miet, u bah Khlain u la buji haduh san ngut ki player ba kynthup wat ïa u kapten jong ka kynhun katta ïa u Hardy Cliff.
Ha kane ka janmiet jong ka jingïakhun, u Nister Roy Suting, kumba la bynshet ha u ïa ka kamram ban ieng ap ïa ka kol, u la pynpaw bïang ïa ka buit bad ka sap ïalehkai ka jong u, kaba ui la lah ban kyrda (save) ïa ki kato katne ki bol kiba la khyrwit da ki rang ïalehkai ka Sikkim bad kawei lei lei kadei hajan bha jong u.
Hynrei kaba kut hi ka long ba ki rang ïalehkai jong ka Meghalaya ha kane ka janmiet kim shim la lah ban ïalehkai kumba la ap khmih lynti ïa ki tad haduh ba kin da mad ïa kane ka jingshah rem.
Kumba ka long, yn don tang kawei ka team ne ka jylla kaban jam shakhmat ha kane ka lympung na kane ka group, ha kaba ka Sikkim da kane ka jingjop kaba hynne ka janmiet ïa ka Meghalaya ka don ha ka lynti jong ka thong ban lah ban jam shakhmat, hynrei shwa ïa kane kan shong pat na ka jingïakhun kaban wan ka jong ka pyrshah ïa ka Arunachal Pradesh kaban long ha ka 21 tarik.
Shwa ban sdang ïa kane ka jingïakhun, la hiar ai mynsiem bad kitbok ïa ki rang ïalehkai jong baroh artylli ki jylla da u Symbud Myntri Rangbah ka jylla u bah Sniawbhalang Dhar bad synran lang ïa u da u President bad Secretary ka MFA bah Hamletson Dohling bad bah Sunesh M Syiem.
