Shillong, Nohprah 18: Ka kynhun ïalehkai kriket jong ka Meghalaya ka la shah pynkhyllem noh na ka U-19 men’s Cooch Behar Trophy 2025-26 plate group hadien ba ka Mizoram ka la pyndep ban beh ïa ka thong ba la buh ha ka pali kaba saw ban jop da 3 wiket ha Anand, Gujarat, hynne ka sngi Palei.
Da kaba donkam 248 ron ban jop, ka Mizoram hapoh ka jingïalam bad ka jingïalehkai ba kyrpang jong u Mapuia (77), Chhuankima (67) bad u Valpuia (67) ka la ïoh ban knieh noh ïa ka jingjop na ka Meghalaya, kaba la lamkhmat ïa ka jingïalehkai ha ki ar sngi ba ladep.
Ban pynkynmaw, ka Meghalaya ka la kamai 219 ron shuwa ban khyllem baroh ki nongtied (all out) ha ka pali tied kaba nyngkong bad nangta ka la pynkut noh ïa ka Mizoram na ka bynta 177 ron. Da kaba lamkhmat ïa ka pali kaba nyngkong, ka Meghalaya ka la shah pynkut noh na ka bynta 205 ron, kaba la pynlong ïa ka Mizoram ban beh ïa ka thong kaba 248 ron ban jop, ha kaba ka pali kaba ar jong ka ka la sdang hynne ka step.
Ka jingshah rem jong ka Meghalaya ka mut ba ka jylla ka la duh ban ïoh rung sha ka final jong ka plate group, ïa kaba yn ïakhun mynta hapdeng ka Manipur bad ka Nagaland. Ka Mizoram ka la jop tang shi sien na ki saw tylli ki jingïalehkai shuwa kane ka sngi, kaba long pyrshah ïa ka kynhun kaba wan ha trai duh jong ka group ka Arunachal Pradesh, katba ka Meghalaya ka la jop lai sien bad mad ïa ka nam rem tang hakhmat ka Manipur.
Ka Mizoram ka la don ar ngut ki nongtied kiba la shah weng noh ha ka ober kaba phra ha u Mewankitbok Kharpuri (3/38) hynrei u Mapuia bad u Chhuankima (kiba la tyngshaiñ ha ka boling da kaba khur 8 wiket ha ki ar tylli ki pali tied jong ka Meghalaya) ki la ïatreilang ban kamai 111 ron na ka bynta u wiket uba lai shuwa ba u Chhuankima un shah pynhap noh ha u Namewanki Pakyntein (1/22).
Ka Meghalaya ka la nang pyrkhat ba kane kan plie lad ïa ki ban weng sa ïa kiwei pat ki nongtied hynrei la bujli ïa u Chhuankima da u Valpuia uba la kamai 67 ron. Ma u bad u Mapuia ki la bynrap sa 71 ron na ka bynta u wiket uba saw bad kane ka la sdang ban pynpaw ka jingkut ka jingkyrmen jong ka Meghalaya.
Hynrei tang mar kumta hi ka la don sa kawei pat ka jingkyrmen ha kaba u Mapuia u la shah pynhap noh ha u Angkit Tamang (3/25), bud sa u Malsawmmuanzela (4). Hynrei u Eric jong ka Mizoram u la ai ka jingïakhun kaba tyngeh katba u Valpuia u dang ïalehkai ban pynjan ïa ka kynhun ban poi sha ka thong. Shuwa ban kynjoh ïa ka thong baroh arngut ki la shah weng noh, ha kaba ka Mizoram ka dang sah sa tang 9 ron ban jop, katba ka Meghalaya ka dang donkam ban weng sa 3 wiket bad kumjuh ruh ban khanglad ïa ki ban kamai ron.
Hynrei kane kam shym la dei satia ban jia na ka bynta ka Meghalaya, namar ba u Ngaihsaka (5 not out) bad u Stephen (7 not out) ki la ïalam ïa ka Mizoram sha kaba kut, da kaba khyrwit ïa ka saw ron (fours) na ka bynta ka jingjop.
Wat hapdeng ka jingshah rem, ka Meghalaya kaba don ha ka kyrdan kaba lai ka dang lah ban pyndep kham shalor ban ïa ka Mizoram kaba don ha ka kyrdan kaba saw ha ka miej, da kaba kamai 18 poiñ la 13 poiñ.
