Nongpoh Nohprah, 17: Ban tip kham bniah ïa ki jingeh ki nongshong shnong halor ki jingduna kiba bun na ka bynta ka bha ka miat ki paidbah hapoh ka Constituency, u Bah Mayral Born Syiem MLA ka Nongpoh mynta ka sngi u la leit ban ïa kynduh ïa ki nongïalam shnong bad ki nongshong shnong ka Shnong Mawkangi shi bynta ban lum jingtip halor ki jingdonkam jong ki paidbah nongshong shnong bad ka Shnong.
Ha kane ka jingleit jurip kum u nongmihkhmat ïa katei ka shnong la sakhi lang ruh da ka jingdon lang u Rangbah Shnong u Bah Badshisha Lumphuid, u Secretary Shnong u Bah Lebelson Lyngdoh lem bad ki nongïalam shnong bad ki paidbah Nongshong shnong.
Na ka liang ka Shnong bad ki paidbah ha kane ka jingioh lad ban ïa kynduh ïa u MLA, ki la pynsngew ïa shibun ki jingduna kiba don hapoh katei ka Shnong. Ha kane ka jingïakynduh kawei na ka jingeh kaba ki la pynpaw ka dei ka jingbym biang thikna ka bording ilektrik, ha kaba ki la pah ban tuklar lem da u MLA ban ioh ïa ka bording kaba thikna hapoh katei ka Shnong.
Kum ka shnong ka la pynsngew ruh sha ki skhor u MLA ba la donkam ban ioh noh da ka surok kaba paka kaba pynïasoh na ka Shnong Mawkangi sha Umkei bad na ka liang u MLA ruh u la kyntu ïa ki ba kin ai da ka jingthoh sha u kum u MLA khnang ba un lah ban ïa kren sha ka tnad PWD halor kane ka jingdonkam jong u paidbah.
Na ka liang ka shnong, nalor kitei ki 2 tylli ki mat ba la buh hakhmat u MLA, ha kane ka sngi ki la pynsngew ruh ïa u, halor ka jingpynkhreh ban pdiang ïa ka jingïaseng Presbytery Ribhoi Sepngi jong ki Rangbah ka ban sa long ha u snem 2028 bad ïaka jingpynkhreh rakhe ïaka Jubilee jong ka Balang Presbyterian ba ki la kyrpad ïa u MLA ban phai khmat lem ruh halor ka jingpynkreh ïa kine ki jingïaseng hapoh katei ka Shnong.
U Bah Mayral Born Syiem kum u MLA ka Nongpoh, ha kane ka sngi u la pynpaw ba u kmen ban ioh ban ïa kynduh ïa ki nongïalam Shnong bad ki paidbah kiba la pynsngew halor ki jingdonkam jongki bad halor kitei ki mat ba la wan rah da ka Shnong u la kular ban shim khia bad ha ha kajuh ka por ruh u kyntu ba dei ban ai ka jingïatrei lang, namar dei tang lada don ka jingïatrei lang lah ban wan rah ïa ki kam pynroi kiba bun hapoh katei ka Shnong.
Lyngba jong kane ka sngi, ka la long ruh ka jingkmen kaba khraw ïa ka Shnong Mawkangi, ha kaba u MLA lyngba ka skhim SRWP 2024-2025 u la ai ïa ka work order kaba T. 3 lak ban pynheh ïa ka Dorbar Hall, khnang ba katei ka Dorbar Hall kan long ka jingmyntoi na ka bynta ban ïa pyrkhat bad saindur ïa ka bha ka miat jong ka shnong ka thaw.
