Pynkha ka NPYF Nartiang ïa ka Young Women’s Wing ban pynkhlaiñ ïa ka jingtreikam ka Party

Shillong, Nohprah 17 : Ka NPYF jongka 1- Nartiang Constituency ka la pynïar ïa ki tnad treikam jongka da kaba ka la seng sa ïa ka Young Women’s Wing khnang ban pynkhlaiñ shuh shuh ïa ka jingtreikam na ka bynta ban khlaiñ ka party National Peoples Party (NPP) hapoh ka Constituency.
Ha kane ka sngi la ïadon lang ki nongïalam jongka party kiba kynthup ïa ki nongïalam jongkane ka Young Women’s Wing, ki samla kiba dei ki dkhot kane ka tnad treikam. Ha kane ka sngi la pynskhem ïa ka Chairperson bad Secretary jongka ne ka tnad treikam.
U Symbud Myntri Rangbah ka jylla uba dei u MLA jongka Nartiang Constituency haba kren ha ka jingïalang u la ong kane ka dei ka lad bad kabu ïa ki samla kynthei ba kin ïoh bynta kumno ban tei bad wanrah ïa ka bha ka miat ha ka imlang ka sahalang. U la ong ruh ba kane ka Young Women’s Wing ka long ruh kum shi bynta ban ailad ïa ki samla lud kynthei ban tynrong lem ïa ka lyngkor ban ïakit ïabah ha ka imlang ka sahlang khamtam ka long ruh kum ka jingpynkhlaiñ ïa ka kyrdan jong ki kynthei lane kata ka women empowerment.
U khmih lynti ruh ba kane ka tnad treikam ba thymmai kan trei shitom bad peit ïa ka bha ka miat bad ka roi ka par naduh ki shnong kiba rit tam haduh kiba heh tam hapoh ka constituency. U khmih lynti ruh ba kane ka tnad treikam kan lam khmat ha kaba pyntyllun ïa ki kam jongka party hapoh ka constituency.