Mawkyrwat, Naitung, 07: Ka lympung ïalehkai kynjatbol ba la tip kum ka South West Khasi Hills District Level Inter-School Subroto Mukharjee Cup Football Tournament 2022 ba la pynïaid da ka ophis jong u District Sports Officer, South West Khasi Hills District ka la poi noh sha kaba kut ha kaba ka Lyngdoh Wanniang Secondary School, Marshillong, ka Jakrem Presbyterian Higher Secondary School bad ka Balang Mawlangwir Higher Secondary School ki la long ki lahduh ha kane ka lympung ba la pynlong hapoh madan Artificial Turf, MDSA, Mawkyrwat.
Haba phai ha ka jingïalehkai, ka Lyngdoh Wanniang Secondary School, Marshillong ka la jop ïa ka Rangthong Christian Higher Secondary School da 2 – 1 kaba dei jong ki khynnah kynthei kiba hapoh ka 17 snem ha kaba ïa kane ka kol la ïoh ban thep da ka Baiahun Lyngdoh Marshilong ha ka minit kaba 11 bad na ka Daphibanbet Lyngdoh ha ka minit kaba 48.
Ha ka jingïalehkai jong ki khynnah shynrang kiba 14 snem hapdeng ka Jakrem Presbyterian Higher Secondary School bad bad ka Mawlieh Upper Primary School ha ka jingïalehkai jong ka Regular Time bad ka Extra Time ki la ïa khaid khlem da ïoh ba ïa thep wat kawei ka kol. Kumta na ka liang ki nongpynïaid ban rai kano ka kynhun kaba jop ki la pynïaleh noh da ka Tie Breaker ha kaba ka Jakrem Presbyterian Higher Secondary School ka la jop da 4 – 3 kol pyrshah ïa ka Mawlieh Upper Primary School.
Nangta, ha ka jingïalehkai kaba khadduh kaba long hapdeng ka Balang Mawlangwir Higher Secondary School bad ka Mawjaraiñ Presbyterian Secondary School ka long ka jingïalehkai kaba itynnad bha bad ba ïa biang bor hynrei ha kaba kut jong ka jingïakhun ka Balang Mawlangwir Higher Secondary School ka la jop da 2 – 0 kol pyrshah ïa ka Mawjaraiñ Presbyterian Secondary School kaba dei ha ka jingïalehkai ki jong khynnah shynrang ba 17 snem. Ïa ki ar tylli ki kol la ïoh ban thep da u Shemborlang Kharjahrin ha ka minit kaba 15 bad na u Iainehskhemlang Jyrwa ha ka minit kaba 58.
Ïa kane ka lympung ïalehkai kynjatbol la wan ban pynhap pyrda da u bah Renikton Lyngdoh Tongkhar, MLA ka Mawkyrwat Constituency bad Myntri jong ka Sorkar Jylla kum u kongsan. Haba kren ha ka jingïalang u bah Tongkhar u la ïaroh ïa ka Sports Department kaba la pynlong kum ïa kine ki jingïalehkai kaba long ka jingmyntoi na ka bynta ban kyntiew ïa ki sap ki phong jong ki khynnah kiba don ha kane ka thaiñ. Ha kajuh ka por u la pynpaw ïa ka jingkmen ban ïohi ba ka jingtrei na ka bynta ban pyndep ïa ki jaka shong ki nongpeitkai ne gallery kiba don ha kane ka Stadium ba ka la nang ïaid shakhmat.
Haba phai pat sha kane ka jingïalehkai u la sngewkmen ban ïohi ba ki khynnah ki la nang kiew ha ka rukom ïalehkai bad ka standard jong ki ka la jan ïaryngkat bad kito kiba ha Shillong da kaba khmih lynti ba kin mih ki nongïalehlai kiba tbit na kane ka thaiñ ki ban mihkhmat ha ka jylla bad ka ri baroh kawei. Haba pynkynmaw ba ha kano kano ka jingïaleh kin don beit kiba jop bad kiba rem da kaba ai mynsiem ïa ki ban nangïaid shakhmat bad ha kajuh ka por u la kyntu ban kiar na ki jingmlien kiba sniew ki ban ktah ïa ka koit ka khiah bad ka jingim jong ki bad u kitbok kitrwiang ba kin nang kiew shaphang ha baroh ki liang.
Ha kane ka sngi la ïadonlang ruh naduh u Superintendent of Police, South West Khasi Hills District, bah B.J. Laloo, MPS, u District Sports Officer, South West Khasi Hills District, bah Damang Syngkong, ki ophisar sorkar bad kumjuh ruh ki riew rangbah.
Ïa kane ka lympung ïalehkai phainal jong kane ka sngi la sakhi bad pynshit pynshngaiñ da ki paidbah nongkyrshan jong baroh ki kynhun kata naduh ki khynnah skul bad kumjuh ruh ki nonghikai.
