Yn long coach u Bah Khlain Pyrkhat ïa ka Jylla ha ka Santosh Trophy; Mynta yn pynbna ïa ka kynhun ba pura

Shillong, Nohprah 16: Ka jingpynbna ïa ka kynhun ïalehkai phutbol ba pura jong ka Meghalaya na ka bynta ki jingïalehkai group stage ha ka lympung Senior Men’s National Football Championship na ka bynta ka Santosh Trophy 2025-26, ka lah ban long ha kane ka sngi Balang.
Mynta u snem ïa ka kynhun yn long coach da u Bah Khlain Pyrkhat Syiemlieh. Dei ma u uba la long u nongpynïaid ïa ka kynhun kaba la poi sha ka phainal jong ka Santosh Trophy ha u snem 2022-23 ha kaba ki la wan kyrdan ba ar hadien ka Karnataka, kaba dei ka jingïakhun kaba bha tam jong ka Meghalaya ha kane ka lympung ïalehkai ba pawnam jong ka ri baroh kawei.
Ka nongbah Shillong kan ïoh ban pdiang ban pynlong ïa lai tylli ki jingïalehkai na ka bynta ka wat ïakhun ba nyngkong (preliminary round), ha kaba ka Group E ka kynthup ïa ka Meghalaya, Sikkim bad ka Arunachal Pradesh.
Ka Meghalaya kan ïalehkai nyngkong pyrshah ïa ka Sikkim ha ka 19 tarik Nohprah nangta ïa ka Arunachal ha ka 23 tarik Nohprah. Ka Sikkim bad ka Arunachal kin ïa aireng pyrshah ha ka 21 tarik Nohprah. Baroh lai tylli ki jingïalehkai kin sdang ha ka por 4 baje janmiet ha madan First Ground-SSA Stadium, Polo.
Tang ki kynhun kiba wan ha khlieh duh na ki khyndai tylli ki Group kin ïohrung sha ka wat ïakhun ba khatduh (final round). Nalor kine, ka West Bengal kaba la rah ïa ka nam lahduh ha u snem 2024-25, ka Kerala kaba wan ba ar bad ka Assam, ka jylla kaba pynlong ïa ka wat ïakhun ba khatduh (final Round), ki la ïohrung beit beit sha ka Round ba khatduh.
Ha u bnai ba ladep, ki nongïalehkai na kylleng ka jylla ryngkat bad kiba ïalehkai na ka bynta ki klob shabar ka jylla Meghalaya ki la ïoh ban shim bynta ha ka prokram pyrshang (trial) jong ka kynhun. Ki la don 40 tylli ki kyrteng kiba la pynrung ha ka thup ba shipor (shortlist) bad yn sa pynduna sha ka 22 ngut ha kane ka sngi Balang.
Ka prokram kilanmet ka la sdang hynnin ka sngi Nyngkong, hadien ka jingpynkut ïa ka SSA Champions Cup, kaba la pyllait ïa ki katto katne ngut ki nongïalehkai kiba dang don ha ka jingpyrkhat na ka bynta ka kynhun ïalehkai ka jylla, ong u Bah Khlaiñ Pyrkhat Syiemlieh. Katba ka Champions Cup ka la ïarap shisha ban pynlong ïa ki player kiba bit ban mih madan, kiba thrang bad kiba la pynkhreh ban ïa aireng, ka don tang ka por kaba lyngkot na ka bynta jong ki ban pyrshang bad ïalehkai lang, la bynrap biang u Vice President ka MFA u Bah Cliff Nongrum.
Ka Meghalaya ka la ïohrung sha ka Quarter Finals jong ka wat ïakhun ba khatduh (final round) ha u snem 2024-25 shuwa ba kan shah rem noh ha ka Services.