Nongpoh, Nohprah 15: Ka Seng Samla Katholik Nongpoh Parish, kaba kdup ïa ki 54 tylli ki Balang Shnong, ha ka 14 tarik Nohprah ka la pynhap noh ïa ka lama jong ka jingïakynduh lang jong ki khun samla kaba la tip kum ka XIX Annual Youth Convention, halor ka phang pdeng “U Jisu U Long Ka Jingkyrmen Jong Ngi” (1 Tim 1:1) bala sdang naduh ka 12 tarik Nohprah ha Purdua.
Ïa kane ka lympung la plie paidbah da ka kong Rona Khymdeit, MDC Nongpoh, ha ka 12 tarik Nohprah, kaba long ruh ka sngi sdang jong ka jingïakynduh. Hadien kata, la bteng ïa ka jingïakop bapher bapher lem bad ki jingïalang ai jinghikai halor ki bynta ba ïadei bad ka jingim jong ki samla bad ka jingïasnoh jong ki bad U Blei.
Nalor kine ki prokram, u MLA ka Nongpoh, Bah Mayralborn Syiem, haka sngi Saitjaiñ u la shim bynta ban kren halor ka phang ba kumno ki samla kin long kiba husiar haka jingïaid lynti jong ka jingim, khamtam eh ban kiar na ki jingdih bad ki jingbam kiba sniew kiba lah ban wanrah jingma ha ka jingim.
Ïa kane ka lympung la pynkut noh ha ka sngi u Blei da ka jingïaseng tyrwa Mass ba khuid ba la ïalam da u Fr. Ritonbor Kharkongor, SDB, Asst. Director Don Bosco Shillong-cum-Vocation Promoter, Provincial Shillong ha kaba u la kren ruh halor ka phang pdeng jong katei ka lympung bad ha ka por janmiet, la pynhap noh ïa ka lama jong ka lympung da u Fr. Sawlus Kharpran, SDB, Spiritual Youth Director ka Seng Samla Katholik Nongpoh Parish.
Ha kane ka sngi pynkut, la wan ban sakhi lang da ki hajar ngut ki khun samla na ki 54 tylli ki Balang Shnong lem bad ki paid riewngeit kiba la tuid ha kane ka sngi kaba kyrpang.
Kum ka jingai mynsiem ïa ki nongïashim bynta, la sam ruh ïa ki khusnam sha ki nongjop ha ki jingïakop bapher bapher kiba la pynlong ha kine ki lai sngi jong ka lympung.
