Ka jingpynsaphriang ki Social Media ba pynïasoh noh u Dr Mukul Sangma sha ka NPP ka dei tang ka Hamsaïa

By Mawphor Editor On Dec 15, 2025

Shillong, Nohprah 14: Ki jingïakren shaphang u Myntri Rangbah barim bad u nongïalam ka Trinamool Congress (TMC) u Dr Mukul Sangma halor ka jinglah jong u ban pynïasoh noh bad ka seng saiñ pyrthei kaba don ha ka bor synshar ka National People’s Party (NPP) ka la long tang kum ka jingpyrkhat hamsaïa.
Katkum ka tyllong khubor na ka party, la ong ba kam shym la don kano kano ka jingïakren pynskhem hapdeng ka NPP bad u Dr Sangma, bad na ka liang ka NPP ruh kam pat leit ïakynduh ïa u Dr Mukul ne ba u Dr Mukul ruh u la leit ban ïakynduh bad ki nongïalam ka NPP halor kane ka kam.
Ka tyllong khubor ka bynrap ruh ba watla u Dr Sangma u lah ban don ka jingïadei kaba jan bad ki nongïalam jong baroh artylli ki party ha ka kyrdan ba shimet jong u, hynrei kam pat shym la don kano kano ka jingïakren shaphang jong u ban leit pynïasoh noh sha ka NPP.
Ka tyllong khubor na ka NPP ka ïathuh ruh ba ka seng ka plie barabor ïa ka jingkhang ban pdiang sngewbha ïa u Dr Sangma lada u la rai ban pynïasoh sha ka party. “Ngi pdiang sngewbha ïano ïano ruh kiba kwah ban pynïasoh bad ka party. Ki jingkhang jong ngi barabor ki long kiba la plie,” ong ka tyllong khubor.
Kane ka jingtharai ka wan naba ka elekshon sha GHADC ka la jan ha kaba ka party TMC jong u Dr Sangma ka mad ïa kiba bun ki jingïaleh jingïakhun ha kane ka jylla.
Kiba bun ki nongïalam ki la iehnoh ïa ka party, ba kynthup ïa u para jong u bad u MLA barim u Zenith Sangma, uba la dep pynïasoh ïalade bad ka Indian National Congress.
U Dr Mukul Sangma u la pynpaw ïa ka jingbym mynjur ïa ka rai jong u para jong u da kaba ong ba u lah ban bakla ha ka rukom pyrkhat jong u haba ïadei bad ka thong ka saiñ pyrthei jong u kaba u lah ban ïoh da kaba pynïasoh biang sha ka seng Congress.
Ka jingtharai jong ka jinglah jong u Dr. Sangma ban pynïasoh sha ka NPP ka dang hi ka bym pat shai bad ka bym pat thikna, ha kaba kine ki arngut ki nongïalam ki dei ruh kiba don ka kyrdan kaba paw bha ha ka thaiñ Garo Hills bad kiba don ruh ka kyrdan kum ki kyrtong kiba lah ban poi haduh ka kyrdan ban long Myntri Rangbah.
Kumba long mynta, na ka liang ka NPP ka dang pynneh ba ki kaiphod jong ka jingpynïasoh jong u Dr Mukul Sangma sha ka party ka dang dei hi tang ka hamsaïa, kaba ieh ïa ka jingbym thikna jong ka jingkynriah ha ka saiñ hima sima.