Wan ba 6 ka Meghalaya ha ka jingdon ki briew kiba im bad u HIV na pdeng ki jylla ha ka Ri

Shillong, Nohprah 13: Ka Meghalaya State Network of Positive People (MSNP) bad Meghalaya AIDS Control Society (MACS) ka la pynlong ïa ka prokram ban rakhe ïa ka World AIDS Day, kaba pynleit jingmut ïa ka jinglong kongsan ïa ka jingai jinghikai ïa ki paidbah bad ki jing kyrshan na ka bynta ki briew kiba im bad ka jingpang HIV.
Haba kren ha kane ka sngi Dr. KL Iawbor, Project Director ka MACS, ka la batai shaphang ka Meghalaya kaba la poi ha ka kyrdan kaba 6 napdeng kiwei ki jylla da kaba nombar ba heh jong ka jingpang HIV positive case. “Kadei ka kamram jong manla uwei pa uwei ban ïalong kawei ban pynkhlaiñ ïa ka kam pynsngewthuh paidbah ha kaba ïadei bad ki daw jong ka HIV infection bad kumno ban ïoh ki dawai dashin,” ka la ong.
Ka Dr. Iawbor ka la banjur halor ka jingdonkam ban pynduh jait ïa ka jingshah pynrem pyrshah ïa ki briew kiba im bad ka jingpang HIV, da kaba ong, “Manla ka jingim ka dei kaba kordor.” Ka pyni ïa ka jingdonkam ka kit ka bah bad ka jingjngai ki jaka sumar kiba long ka daw bah jong ka jingeh ban pynbud ïa ki prokram na ka bynta ki briew kiba im bad ka jingpang HIV.
“Nga ai khublei ïa ka MSNP bad baroh ki dkhot naba ki la pynkhlaiñ ïa ka network hapdeng ki briew kiba im bad ka HIV ba kin wan shakhmat na ka bynta ka follow-up program,” ong ka Dr. Iawbor. Ka MACS ka la pynïar ïa ka network jong ka, da kaba ai ki lad jingïarap pisa ban kyrshan ïa ki ART center bad pynlong ïa ki jingrakhe Advance Christmas bad ki khynnah kiba im bad ka HIV.
Kane ka prokram ka thmu ban kyntiew ïa ka jingieid, ka jingïalong kawei bad ka jingkyrshan na ka bynta kito kiba shah ktah da ka HIV/AIDS, da ka jingbuh thong ban pynduh pyndam ïa kane ka jingpang ha Meghalaya.