Nongstoiñ, Nohprah 11: Na ka bynta ban pynsuk ïa ki paitbah nongshong shnong kiba pang ba shitom ban ïoh ïa ka jingsumar kaba biang, mynta ha ka 11 tarik Nohprah 2025 u bah Methodius Dkhar MLA ka Mawshynrut constituency, u Myntri ha ka sorkar jylla u ba dei peit ïa ka tnad sam mar bam bad Labour, u la plie paitbah ïa ki ar tylli ki Sub Health centre ka Japung Health & Wellness Centre bad ka Wahlyngdoh Sub Centre.
U Myntri sorkar u la plie ruh ïa ka taiew ba kyrpang na ka bynta ki khunlung kiba dang kha hapoh kane ka taïew haduh kiba la dap arphew phra sngi ka karta. La ïadon lang ha ka prokram da ka kong M.K Sohliya District Medical & Health Officer u Doctor Tyllibor Syiem District Medical Officer ka tnad ka koit, bah C.P Mawkon Additional Deputy Commissioner West Khasi Hills, u bah Sraly Rashir MDC ka Mawshynrut ki staff jong ka tnad ka koit ka khiah, ki Nurses, ki ASHA bad kiwei kiwei ki nongtrei.
La pynlong ïa ki jingïalang ba lyngkot ha kaba la ïoh ïa ka jingpynshai halor ka jingkoit jingkhiah da ka Kong M.K.Sohliya District Medical & Health Officer West Khasi Hills, kaba la ong ba ka jingthmu jong ka sorkar ban shna ïa ki Sub health centre ka long ban pynsuk ïa ki longkmie kiba don kam ban leit kha khunlung bad ïa kiba donkam ban phah check up man la ka sngi.
Ka la pynsngewthuh ïa ki longkmie kumno ba kin sumar ïa ki khunlung naduh ba dang kha bad ban ai jinghikai ruh ïa ki ban sumar na ka jingpang Pneumonia ka jingpang kaba ktah jur bha ïa ki khunlung naduh ka por ba dang shu kha.
U bah Methodius Dkhar MLA Myntri sorkar u ba long u kongsan, u la pynkup burom ruh ïa ki trai khyndew, kiba la ai sngewbha ïa ka jaka na ka bynta ban shna ïa katei ka Sub centre bad ïa ki rangbah kiba la trei shitom bad ïalam lynti naduh ba sdang haduh ba katei ka kam ka la urlong.
Hadien ba la dep ban plie ïa ka Sub health Centre ha Wahlyngdoh, u bah Methodius u la hiar sah ka shnong Risiang na ka bynta ban plie ïa kawei pat ka sub health centre kaba don ha katei ka shnong, ha kaba la ïoh ïa ka jingpynshai lyngkot na U Doctor Tyllibor Syiem halor ka jingsdang jong ka tnad ka koit ka khiah ban jurip ïa ka jaka ban shna ïa katei ka jaka sumar.
U bah Methiodius haba ai jingkren u la ong ba ka Mawshynrut constituency ka dei kaba ïar haduh katta katta bad ki kam pynroi ki dang duna bha. Ki paitbah ki angnud bad ki ju dawa na ka por sha ka por ban pynïoh ïa ki, hynrei wat la u la shah jied kum u nongmihkhmat um lah ban pynurlong ïa baroh ki jingdonkam jong ki paitbah ha kajuh ka por.
Wat la katta ruh u la ong ba u la pyrshang katba lah ban pynsngew sha ka sorkar ba ki paitbah hapoh ka constituency jong u ki dang donkam shibun bah ki jingïarap na ka sorkar la ka long ki surok, ki skul bad ki jaka sumar. U la ong ruh ba napdeng ki jingdawa ba ki paitbah ki la pynsngew ha u, ka koit ka khiah ka dei ka mat kaba ha khmat duh kaba u la shimkhia ha kaba um shym la shong kli kti, ha kaba ka sorkar ruh ka la shah skhor bad ka la pynurlong ïa ka jingkyrpad jong u.
U la ong ruh ba ka jingdon jong ki jaka sumar kiba hajan ka pynsuk shibun ïa ki paitbah haba ki pang ki shitom, hynrei lada ki jaka sumar ki jngai ka pynshitom haduh katta katta ïa ki paitbah namar ki hap ban pylut bun ka por, nalor kata ka ktah ïa ka jinglut jingsep ha ka leit ka wan bad kumta ter ter.
U la ong ba ka jingplie ïa kitei ka jaka sumar ka la pynsuk shibun ïa ki shnong kiba mar jan, kumta ka donkam ba kin ïatreilang bad ki nongtrei kum ki Doktor, ki Nurses bad baroh ki nongtrei ha kitei ki jaka ai jingsumar.
U la kyntu ruh ïa ki paitbah ba ki dei ban don ka jingïaburom markylliang hapdeng ki nongtrei ka koit ka khiah bad ki paitbah. U la kyntu ruh ba ki nongtrei ha kitei ki jaka sumar, ki dei ban trei da ka jingieit bad ka jingsbun khnang ba ki paitbah ruh kin sngew jan kin ïatreilang ha ki por baroh.
