Mawkyrwat, Nohprah 11 : U Bah Pius Marweiñ uba dei u MLA bad MDC jong ka Ranikor Constituency hadien ba ula pyndep ïa ki jingkular ban noh synñiang sha ki shnong ki thaw lyngba ka MDC Scheme, kumta ha kine ki khyndiat sngi ula ïoh ban plie paidbah ïa ki ar tylli ki Dorbar Hall kata ha Shnong Kensimphlang bad ha Shnong Sarin kiba hapoh ka South West Khasi Hills District.
Lah ban kdew ba ïa kine ki ar tylli ki Dorbar Hall la mang pisa mar T. 10/- lak tyngka kaba dei na ka MDC Scheme ba la bei tyngka da ka Khasi Hills Autonomous District Council (KHADC) hapoh ka 15th FC Untied Grant jong u snem 2020 – 2021 bad jong u snem 2021 – 2022.
Ha kaba ïa dei bad ka Dorbar Hall ha Shnong Sarin kaba dei ka shnong kaba la rim tam kaba la longshong la kumba 400 snem tam ei ei hynrei naduh kita ki snem kam pat don ka Dorbal Hall ba pura hynrei la ong ba dei ha ka jinglong nongmihkhmat jong u bah Pius Marweiñ kane ka shnong ka sa ïoh.
Namarkata, na ka liang ki paidbah nongshong shnong ki la pynpaw ka jingsngewnguh bad ai khublei kyrpang ïa ka jinglong ba la kloi jong u nongmihmhmat ha kaba ula sngap ïa ka jingud jingnam jong ki paidbah namar kumba long ha ki snem kiba la dep lada long kino kino ki jingïalang la hap ban pynlong ha ki ïing briew ne ki ïingskul hynrei ha kane ka kynti ki la ïoh ïa ka ïing Dorbar ba paka.
U bah Pius Marweiñ kum u nongmihmhmat haba kren ha ka jingïalang u la ong ba hadien ba ki shnong ka la pynsngew ha u ïa ki jingdonkam, kumta, kum u nongmihmhmat um shym la kyrngah hynrei u la bhah pisa kyrpang na ka MDC Scheme ha kaba ka jingmang pisa kaba mar T. 10/- lak tyngka ban shna ïa ka Dorbar Hall ha Shnong Sarin bad ha shnong Kensimphlang.
Haba kren ha kaba ïa dei bad ka shnong Sarin u la pynkynmaw ba kane ka shnong ka lah don da ki spah snem hynrei ïa ka Dorbar Hall kim pat don bad ka jingpynlong jingïalang jong ki ka long ha ïing briew ne ha ïing skul bad ka shem jingeh ïa ki paidbah ban shong ne ban sngap namar ki hap shong habar hynrei mynta ynda ki la ïoh ïa kane ka Dorbar Hall kin sa ïoh ban pyndonkam ha ka rukom kaba dei katkum ki jingpynïaid jong ka shnong. Kumta, u la kyntu ïa ki paidbah ba kin sumar ïa kane ka ïing kum ka ïing la jong khnang ba kan jingitynnad jong ka kan neh slem.
Ha kane ka jingplie paidbah ïa ki Dorbar Hall, la sakhi lang naduh ki Rangbah Shnong jong ka Shnong Kensimphlang bad ha Shnong Sarin, ki nongkitkam shnong, ki longkpa, ki longkmie bad kumjuh ruh ki khun samla.
