Shillong, Nohprah 11: U Myntri Rangbah ka jylla Meghalaya, u Conrad K Sangma, ha ka 11 tarik Nohprah 2025 (sngi Palei) u la leit ban jurip ïa ka jingtei ïa ka Mawkhanu Football Stadium Complex ha New Shillong, ka ban sa long ka madan phutbol kaba heh tam ha ka ri.
Hynne ka sngi Palei u Myntri Rangbah ka jylla ryngkat bad kiwei ki riew pawkhmat ki la ïoh ban shim bynta ha ka ban theh shi korni ïa u dewbilat ha North Stand jong ka madan kum ka dak jong ka jingbuh ïa ka nongrim katba u Fr Richard Majaw, u la ïalam ha ka jingduwai halor katei ka jingtei thymmai. Ha kane ka sngi la ïadon lang ruh u Myntri ka tnad ïalehkai u Wailadmiki Shylla.
Ka sorkar jylla ka thmu ba kane ka madan, kaba lah ban ñiam 40,000 ngut ki nongpeitkai, kan long kaba heh tam kaba la shna kyrpang na ka bynta ka phutbol ha ka ri baroh kawei. Ka mang tyngka ban tei ïa kane ka madan kan long haduh T. 732 klur.
“Ka Meghalaya kadei ka jylla kaba ieid bad sngewtynnat bha ïa ka football bad kane ka jingtei kan long ka jingpynshlur bad jingkyntiew kaba khraw ïa ki kam ïalehkai khamtam eh ha ka liang ka phutbol,” la ong u MR ka jylla.
“Kane ka madan kan long ka pdeng jong ka jingangnud jong ka Meghalaya ban long ka ‘Nongbah ha ka jingïalehkai phutbol jong ka ri India,” la ong u Conrad ong ha ka por ba ai ïa ka mang tyngka jong ka jylla ha u bnai Lber.
Ki nongpynwandur ïa kane ka complex, ka Collage Design Pvt Ltd ka la ong ba yn shna ïa kane ka Stadium ha kata ka rukom ban don “ki lad ki lynti kiba lah ban pynneh pynsah ha ka liang ka mariang bad ka pisa tyngka.
Watla la tei kyrpang na ka bynta ka phutbol, khamtam eh ban pynlong ïa ki jingialehkai phutbol bar ri (international football), hynrei kane ka jaka kan long kaba lah ban pyndonkam ha kiba bun ki kam. Kane ka Stadium kan don ka pung jngi, ki jaka ïalehkai tennis, ka jaka ïalehkai gymnasium, ki jaka ïalehkai squash, nalor ki jingïalehkai, kane ka complex kan pynlong ruh ïa ki tamasa lehkmen kiba heh bad kiwei kiwei ki jingïalang paidbah, ong ka Collage Design.
