SHILLONG, Nohprah 11: Ka All Meghalaya Kickboxing Association (AMKA) sa shi sien pat ka la wan rah nam bad burom ïa ka jylla da ka jingïalehkai kaba kyrpang ban khur bun tylli ki takma ha ka 29th Senior/28th Junior/28th Sub-Junior National Kickboxing Championship 2025 ha Nongbah Bhubaneshwar, Orissa.
Kane ka Championship ka ba saw sngi lynter ka la sdang naduh ka 04 tarik haduh 07 tarik Nohprah 2025 bad la pynïaid ïa ka daka Indian Association of Kickboxing Organisation (IAKO), ha kaba ka jylla ka la ïoh ban khur haduh 124 tylli ki takma, ba kynthup ïa 31 tylli ki takma ksiar, 26 tylli ki rupa bad 67 tylli ki rnong. Ha kaba kut jong kane ka jingïakop ka jylla ka la ïoh ban khur ïa ka nam 1st Runners up.
Ki la don kumba 140 ngut ki nongïalehkai (shynrang bad kynthei) kiba la mihkhmat ïa ka jylla hapoh ka lama jong ka AMKA ha katei ka Championship, kiba ïashim bynta naduh ka kyrdan Tiny Tots, Sub-Junior, Junior bad Senior.
Kaba pynsngew sarong shuh shuh ka dei ba na pdeng kine ki nongïalehkai arngut ki la ïa shim bynta ha ka Professional Fight, ha kaba u Royalson Lapang u la ïakhun ha ka rynsan ïakop ISKA Kunkhmer, katba u Shanbor Kurbah u la ïakhun ha ka IAKO Pro ba la pynlong da ka Indian Association of Kickboxing organization.
Ka kynhun ka la wanphai noh sha la ïing ha ka 10 tarik u Nohprah bad la pdiang sngewbha ha nongbah Guwahati da u General Secretary ka North East Kickboxing Association u Putul Sonowal, kumjuh ruh ynda ki la wanpoi ha ka jylla la pdiang sngewbha ïa ki da ki nongïalam jong ka AMKA ryngkat ki kmei kpa kiba la wan ban ïa don bynta lang ha kane ka sngi.
Haba ai jingkren na ka liang jong u President ka AMKA, Bah Samuel Hashah u la pynpaw ïa ka jingsngewnguh ïa ki rang bad ki thei ïalehkai ki ba la ïalehkai bha bad wan rah nam bad burom ïa ka jylla lyngba ka jingjop ka jong ki, “ka jingtrei shitom ka jong ki ka wan rah ïa u soh u ba thiang”.
Shuh shuh u la ïathuh ba ha kane ka kynti ka kynhun kam shym la ïoh jingïarap nano nano wat na ka sorkar, baroh ka dei beit da ka jingkyrshan jong ka Association bad ki kmei ki kpa jong ki khynnah ba ki khyynnah ki la ïoh ka lad ban leit ban ïa shim bynta.
U la pynkut da kaba ong ba u don ka jingkyrmen ba ka sorkar kan ai jingkyrshan ïa kine ki rang bad ki thei ïalehkai kiba la wan rah nam bad burom ïa ka jylla lyngba ka Scholarship kaba ka sorkar jylla ka la mang na ka bynta kito ki nongïalehkai kiba khur takma ha ki lympung ïakop.
