Shillong, Nohprah 10: U Purav Agarwal, u nongkawang bol off-spinner na Tura, u la shah pynrung ha ka thup jong ka ïew ïadie ïathied na ka bynta ka Indian Premier League 2026.
La sngewthuh ba ka kyrteng jong une u rangïalehkai ba 22 snem ka rta kan sa rung sha ka Player Auction ka ban long ha ka 16 tarik u Nohprah ha Abu Dhabi.
U Purav u la mihkhmat ïa ka Meghalaya ha ka kyrdan U-19 bad U-23, kaba dang shen ha ka Col CK Nayudu Trophy 2025-26. Ka samoi ïalehkai kaba u la lah ban tyngshaiñ bha ka dei ha u snem 2021-22 ha kaba u la lah ban khur 30 wiket ha ka U-19 men’s Cooch Behar Trophy. Dang shen, u la ïatreilang bad ka kynhun ïalehkai IPL ka Rajasthan Royals kum u net bowler, kaba pyni ïa ka jingaiti lut, ka jinglong ryntih bad ka jingieid jong u ïa ka kriket.
Na ka liang jong ka MCA ka sngew sarong haduh katta katta ïa ka jingkiew jong u Purav kum u nongïalehkai kriket bad u Honorary Secretary u Bah Rayonald Kharkamni u la ai khublei ïa u bad kitbok kitrwiang ïa u na ka liang ka ïing ka sem kriket ka jylla baroh kawei.
