Kular u CM ban shimkhia ban kyntiew lang ïa ka Ephatha Society ha EJHD

Khliehriat, Nohprah 08: U Myntri Rangbha ka jylla, u Conrad Sangma ha ka prokram ba kyrpang ha ka jingplie ïa ka Hostel jong ka Ephatha Society ba la pynlong mynta ka sngi ha shnong Dkhiah West ha ka dong Mookhu East Jaiñtia Hills District u la long ka jingkmen bad jingkyrmen ïa ki paidbah khamtam ïa kito ki briew kiba don jingduna ha ki dkhot met ha kaba u la kular ba na ka liang ka sorkar kan shim ïa ka jingkitkhlieh ban kyntiew lang ïa katei ka society ka ban long na ka bynta ka jingbit jingbiang ki briew kiba don jingduna ha ki dkhot met.
Kawei kaba sngewtynnad ka long ba u myntri rangbah ka jylla u la kular skhem ban shim khia kham kloi ban pynioh shwa ïa ka surok kaba bha ban ïaid na surok national highaway ban poi sha ka jaka ba don ka hostel khnang ban pynsuk ïa kito kiba don jingduna ha ki dkhot met ban poi sha hostel bad halor kane u la bthah ïa u Deputy Commissioner ka East Jaiñtia Hills District ban ïa pynbit pynbiang noh ban ka tnat ba dei peit ïa ki srok lynti syngkien namar u kwah ban pyndep noh ïa ka surok hapoh kine ki por bad ka aiom.
Ha kajuh ka por, u myntri rangbah ka jylla u la ai ki kyntien pynshlur bad ai mynsiem ïa ki briew kiba don jingduna ha ki dkhot met bad u la ai ruh ka jingiaroh halor ki sap ki phong ba kyrpang ba ki don bad ruh u pynpaw ka jingkmen ba don napdeng ki briew kiba na kane ka Ephatha Society kiba la pyndep ïa ka kyrdan pule bapher bapher kum ka B.Sc, B. A bad kiwei kiwei ki kyrdan jingpule, u la kular ruh ban noh syniang da ki tiar tem sha ka Ephatha Society ban kyntiew ïa kito kiba don sap ha ka put ka tem ha ka rwai ka siaw.
Kum ka jingai mynsiem ïa kito kiba don jingduna ha ki dkhot met u la ong” “ bun ki jingeh ha ka jingim hynrei wat sngew ba phi long kiba poh, wat sngew ba phim lah, wat sngew ba phim lah ban jop, phi don ki sap bad phi lah ban iakhun hapoh ka jylla bad hapoh ka ri ruh na kata ka daw wat duh mynsiem, wat duh jingkyrmen, phi dei ban poi sha ka thong bad phi dei ban long kiba jop, ngi don lang bad phi ha kano kano ka por”
Kawei ruh kaba kongsan kaba u myntri rangbah u kular ka long ban pyndep noh ïa kane ka hostel bad hadien kata ban pynbit pynbiang ïa kiei kiei kiba donkam ha kane ka hostel bad ïa kiwei kiwei ki kam pat kum kaba kyntiew ïa ka kam ri jingri bad kiwei kiwei ki jait kam kaba dei hapoh ka phase kaba ar un sa leh ynda la lah pyndep shwa ïa ka jingshna ïa ka hostel bad ka surok.
Ha kane ka sngi u Myntri rangbah ka jylla u la sam ruh ïa ki khusnam sha u bah Health Tlang, uba na ka shnong Wahsarang, uba don jingduna ha ki dkhot met, uba la mihkhmat na ka jylla Meghalaya ha ka Purple Fest 2025 ba la pynlong ha ka jylla Goa, uba la pyni ïa ka sap suh jaiñ bad thaiñ jaiñ, u bah Kermiki Siangshai, uba don jingthut ha ki bor iohi, uba na ka shnong Moolamanoh uba la lah ban plie ïa kawei ka jaka ai jinghikai ka Computer Software Teaching Centre ha Ladrymbai, u Kularmi Sana uba na ka shnong Tuber Kmai shnong, uba la pyndep ïa ka kyrdan Bachelor of Arts na Jaiñtia Eastern College Khliehriat, kumjuh ruh ai ïa ka khusnam la ai sha ka kong Patty Phawa kaba na Dkhiah West kaba la nohsyniang da kaba ka la ai ei ïa ka jaka sha ka Ephatha Society na ka bynta ka jingmyntoi jong ki briew kiba don jingduna ha ki dkhot met., u bah Secondborn Rymbai, una na shnong Wapungskur uba la ïa shim bynta lang bad ka kynhun na Meghalaya ha ka lympung VI National Wheelchair Bascetball Championship ba la pynlong ha nongbah Mohali (Punjab), ka kong Shwabanroi Thoo, kaba don jingduna ha ka bor ban iohsngew ba na shnong Rymbai kaba la pyndep ïa ka jingshah hikai ka Long Term Training in Fashion Designing, ka kong Sinitylutmon Kympat, ba na shnong Tluh kaba ka wan ha ka kyrdan ba nyngkong ha ka jingiakhun kti ne ka Arm Wrestling bad Para Arm Wrestling Championship 2024 bala pynlong ha Nagpur, ha Maharashtra bad kaba la leit mihkhmat ruh ha ka Asian Arm Wrestling Cup 2024 ba la pynlong ha Mumbai, kumjuh ruh ka la mihkhmat ha ka XXIII Asian Arm Wrestling Championship 2025 ha Delhi.
Kiba la ïa don lang ha kane ka prokram ki kynthup ruh u MLA jong ka Khliehriat, u bah Kyrmen Shylla, u Deputy Commissioner East Jaiñtia Hills Distrivt, u Shivansh Awasthi, IAS, u Superintendent of Police East Jaiñtia Hills District, u Vikash Kumar, IPS, u President jong ka Ephatha Society, u bah Emlangmi Sapuh lem bad kiwei kiwei ki heh sorkar kiba napoh ka district, ki Waheh Shnong na ki shnong bapher bapher, ki dkhot jong ka Ephatha Society ba kynthup ruh kito kiba don jingduna ha ki dkhot met bad kiwei kiwei ki riew rangbah.
Ïa ka prokram la pyniaid da u Dr Heiporuni Bang uba na Wapungskur, la ioh ruh ïa ka jingrwai kyrpang na ki heprit kiba dei ki nongshong shnong kiba kyrpang jong ka ri kiba don mynta hapoh ka jingkdup ka Ephatha Society.