Sdang ka 9th Winter Camp & Youth Leadership Training ki khynnah Scouts-Guides ha Iooksi
Jowai, Nohprah 08 : Kumba ju long manla u snem ki bor pynïaid ka District Association jong ka Meghalaya Bharat Scouts & Guides, West Jaiñtia Hills, kala pynlong ïaka 9th Winter Annual Camp & Youth Leadership Training ha David & Lois Rees Memorial Secondary School, Tongkiad Iooksi.
Ka thong ban pynlong ïa kane ka prokram ka long shibynta ban ai lad ïaki khynnah Scouts-Guides ban ïakynduh lang shisien shi snem bad ban pynjanai ïa ki jingtip kaba ki ïoh lyngba ki rukom ai jinghikai kynthup naduh ka rukom teh tylli (knoting & Lashing), ka jingshna ïa ki jaka buh tiar da ki dieng ki siej (gadget) bad kiwei de kiba long katkum ka rukom dustur jong ka Scouts-Guides Movement.
Ha une u snem ïa kane ka prokram la sdang naduh ka 5 tarik u Nohprah bad pynkut haka 9 tarik Nohprah, 2025 ha kaba ki khynnah skur na ki Unit bapher bapher jong ka District kila wan ban ïashim bynta ha ryngkat ka jingsynran lang ki Scouts Master bad ki Guide Captain.
Ïa ka jingïalang la pynïaid da u Carefully Gassah, DOC (S) MBS&G-WJHD la ïoh ka jingkren pdiang burom na ka Dolly Lamare, Guide Captain Jowai Open Unit, ka jingkren halor ka thong jong ka prokram da u Pet Dhar, Jt. District Secretary, MBS&G-WJHD, katba u Adiam U Bthuh, District Secretary MBS&G-WJHD ula ai ki kyntien ai khublei.
La wan ban plie ïa kane ka 9th Winter Annual Camp & Youth Leadership Training da ka Saramai Tariang, Vice-President, MBS&G, haka jingdon lang u Richard B Uriah, Principal North Liberty Hr. Secondary School, Jowai kam u symbud kongsan, ki khynnah skur bad ki nonghikai ka David & Lois Rees Memorial Secondary School, Tongkiad Iooksi.
Ka Saramai Tariang, Vice-President, MBS&G haka jingkren kum ka kongsan kala kyntu ïa ki khynnah Scouts-Guid da kaba kumtu ïa ki khynnah ban shim ïa kane ka kabu lyngba ka prokram ka long shi bynta ban ïoh ïa ki jingtip ba thymmai bad kala kyntu ban ban long kiba ïaishah bad don ka mynsiem jingïasngew shipara khnang ba hadien ba kut kane ka prokram kino kino ki jingtip kiba la ïoh jinghikai nangne kin ïoh ban sam lem sha ki ïing ki sem bad sha ki lok ki jor.
Katba u Richard B Uriah, Principal North Liberty Hr. Secondary School, Jowai haka jingkren ula pynkynmaw ïa ka kyntien ‘Be Prepared’ kaba dei ka kyntien ai mynsiem jong ka Scouts-Guides Movement, ula kyntu iï ki khynnah ban long kiba la pynkhreh ban mad ïa ki jingeh lyngba kane ka Camping kumjuh haka jingïaid lynti jong ka jingim briew kiba lah ban kynduh shibun ki jingeh.
Ha kane ka prokram la pynlong ruh ka jingpynkup burom ba kyrpang ïa ki Rajya Pursakar Scouts-Guides jong une u snem 2025 kiba la dep shah pynkup burom na u Lat ka Jylla ha u bnai Naiwieng ha Raj Bhawan Shillong.