Jowai, Nohprah 07 : Ka ophis jong u Sub-Divisional Public Relations Officer, Amlarem Civil Sub-Division, kala pynbna paidbah ba la khang ban ïaid ki kali heh bad ki Bus haka surok Amlarem–Padu–Nongbareh kata naduh ka shnong Khonglah haduh ka shnong Nongbareh namar ka jingtrei ban shna ïa ki 4 tylli ki jingkieng RCC ha ki bynta jong katei ka surok.
Kine ki 4 tylli ki jingkieng (RCC Bridge) kiba dang shna ha katei ka surok ki kynthup ïa ki lai tylli ki jingkieng RCC haka Shnong Khonglah kawei kaba jrong 16.30 Km, kawei 16.670 Km bad kawei 16.960 Km. Katba kawei ka jingkieng ha shnong Nongbareh kaba jrong 20.85 Km.
Ka jingpyntrei ïa kitei ki jingkieng ka dang ïaid shakhmat mynta na ka bynta ban wanrah ïa ka jingshngaiñ jong ki kali heh. La pyntip ruh ïaki nongwan jngohkai kiba wan da ki bus ban leit sha Amkoi ki la hap ban pynsangeh ha shnong Khonglah.
Kane ka jingmana kan treikam mardor tad haduh ba la pynbna da kumwei pat, la kyntu ïa ki paidbah bad ki nongwan jngohkai ba kin pyndonkam da ki kali rit ban lait na ka jingthuh haka leit ka wan.
