SHILLONG, Nohprah 04: Ka AGE’S bad ka Mawklot CC ki la jop ïa la ki jong ki jingïalehkai ha ka lympung Shillong Cricket Association Cricket League 3rd Division, kiba la long hynne ka sngi Palei, 04 tarik Nohprah, 2025.
Baroh ar tylli ki kynhun ki la jop da kaba pyndep ban kynjoh ïa ka thong ba la buh hakhmat jong ki, ha kaba ka AGE’S ka la jop da 4 wiket pyrshah ïa ka League Heroes, hadien nangta ka Mawklot CC ka la pynliem noh da 5 wiket ïa ka Raitsamtiah CC ha ka jingïalehkai kaba bud.
Hadien ba jop ïa ka jingkynting pisa (toss) ka AGE’S ka la aiti ïa ka liang pyrshah ba kan tied nyngkong, ha kaba ki nongtied jong ka League Heroes ki la lah ban kamai 154 ron haki 20 ober, da kaba hap 7 wiket, u Sonu Kumar Mandal u la long u namtam ha ka tied da 59 ron naki 48 tylli ki bol.
U Jamestar B Marak, rangkawang bol jong ka AGE’S, u la seisoh bha ha ka boling, da kaba khur 4 wiket bad ailad tang 22 ron naki 4 ober, shuwa ba ka kynhun kan pyndep ïa ka kamram ban kamai 160 ron da kaba khyllem 6 wiket haki 17.1 ober.
Watla u Deepak Sahani u la trei shitom ha ka liang ka boling na ka bynta ka League Heroes, da kaba khur 3/23 naki 3 ober, hynrei kam pat biang ïa ka kynhun ban khanglad ïa ka Ages ban kynjoh sha ka thong.
U Rangsang jong ka AGES u la lamkhmat ha ka tied da kaba kamai 55 ron naki 32 bol, hynrei ïa ka nam Player Of The Match la khur da u Jamestar B Marak, uba la kamai 5 ron ha ka tied bad khur 4 wiket ha ka boling.
Ha ka jingïalehkai kaba bud, ka Raitsamtiah ka la buh ïa ka thong kaba 122/7 haki 20 ober hadien ba jop ïa ka jingkynting pisa (toss) bad shimti hi ban tied nyngkong. U Embok Kharbani u la noh synñiang 23 ron naki 12 bol. Katba u Pongshai Thawmuit, u la long u la long u nongkawang bol ba seisoh tam jong ka Mawklot, da kaba khur 3/26 naki 3 ober.
Ka la donkam tang 10.1 ober ïa ka Mawklot ba kan pyndep ïa ka thong, da kaba kamai 123 ron bad duh 5 wiket. U Shahborlang Kurkalang u la long uba kongsan tam na ka bynta ka kynhun, da kaba kamai 34 ron naki 15 bol, kaba pynlong ïa u ban khur syndon ïa ka khusnam Player Of The Match.
