Da ki ’Sew smadien thied ka DREAM ban pynkhlain ia ka jingbud dien ïa u Drok ha ka jylla

Shillong, Nohprah 3 : Ka Drug Reduction, Elimination & Action Mission (DREAM) kala thied ïa 6 tylli ki ’sew smadien ba la dep hikai pyntbit bha, kynthup ïa lai tylli ki Belian Malinois bad lai tylli ki Cocker Spaniels, ban pynkhlaiñ bad ïarap ïa ka jingbud dien bad jingkhynra drok bha ki Pulit ka Jylla.
Kine ki ksew, ba shongdor haduh T. 12,54,000, kila leit hikai pyntbit kumno ban lap ïa u drok ha ka jaka ai jinghikai kaba don ha Bengaluru naduh u bnai Iaiong haduh u Naiwieng 2025.
Khyndai ngut ki Pulit ka Meghalaya ruh kila ïoh jinghikai lang ha ryngkat bad kine ki ksew ban pynthikna ïa ka jinglah treikam bha.
U Director ka DREAM Bah Francis Kharshiing ula pynpaw ba kine ki ksew kin nang ïarap ïa ka jinglah jong ki Pulit ban treikam bha, khamtam ha kaban lap ïa u droks bala buhrieh bad lyngba ka jingpeit thuh ïa ka rukom leh ki briew.
Ki ksew mynta ki dang don hapdeng ka jingkhmih ba kin long myllien ïa ka jinglong jingman ha Jylla bad yn sa pyndonkam noh ïa ki hadien ba kila juh bad la lah ban im kat kum ka jinglong ki jaka bad ka suiñbneng ka Meghalaya.
“Ia mynta, kine ki ksew kila pyndep ïa ki jinghikai bad kila don hapoh ka jingkhmih jong ka ANTF (Anti-Narcotics Task Force) ka Tnad Meghalaya Police” ula ong.