Shillong, Naiwieng 03 : Ka Sorkar Meghalaya kan pynlong ïa ka jingpeit bad wad bniah ïa ka jingpyndonkam drok ha ka Jylla baroh kawei (State-wide Drug Use Survey), da kaba thmu ban lum ïa ki jingtip kiban long ki sabut bad ki sienjam ban lah ban tuklar bad ïada kynthup ïa ki lad jingirap ba kin lah ban sangeh noh nalor ka jingkyrshan ha ka imlang sahlang.
Ïa kane ka sorbe la shim da ka Sankardev College ha ryngkat ka jingïatrei lang bad ka Drug User Community, bad shen kin sa sdang noh ïa ka jingtreikam kaba nyngkong ha nongbah Shillong bad hadien kane pat kin sa leit sha kiwei pat ki bynta jong ka distrik ha ka jylla.
“Mynta ka sngi ka dei ka jingïasoi ïa ka soskular hapdeng ka DREAM Mission bad ka Sankardev College, Shillong, ka jingïatreilang kaban aibor shuh shuh ban wad bniah halor ka jingjyllei u drok ha ka Jylla,” ong u Director ka DREAM u Bah Francis Kharshiing ha ka sngi Balang.
U la pynksan ïa ka jingdonkam jong ka jingwad bniah, da kaba ong, “Ki jinglap na ka jingwad bniah kin ïarap pat ïa ka sorkar ban thaw ïa ki lad jingïarap kiba kham thikna, kiba la pynkhreh bad kiba la pynshong nongrim na ka bynta ban ïada, ban ïakhun ïa ka jingkyrni, ban pynbha pat, bad ka jingkyrshan ha ka imlang sahlang.”
Shuh shuh u ong ba ka jingwad bniah ka long ka sienjam kaba kongsan ha ka jingthmu jong ka Sorkar ban ïakhun pyrshah ïa ki jingdih buaid bad ban ïada ïa ka lawei jong ki samla ka Meghalaya.
Ka jingdon bynta lang jong ka Drug User Community kynthup ïa ka MUF bad ka MeduNet, ka pyni shai ruh ïa ka jingangnud jong ka Sorkar halor kane ka bynta.
La kdew ruh ba u Myntri Rangbah ka jylla u Conrad K Sangma u la pynskhem ïa ka jingkut jingmut jong ka sorkar, da kaba ban jur ba ka jingïakhun pyrshah ïa u drok ka dei ka jingkitkhlieh lang jong ka sorkar, ki jaka pule, ki shnong ki thaw, bad ka imlang sahlang baroh kawei.
“Ka sorkar ka dang ïai bteng ban ïada ïa ki samla na ka jingma jong u drok,ka jingai jingkyrshan bad ki lad ai jingsumar na ka bynta kito kiba shah ktah bad ai bor ïa ka imlang sahlang ban ïashim bynta lang ha ka jingïakhun ban weng ïa kine ki jingeh,” ong u Myntri Rangbah.
