Nongpoh Nohprah 03 : U MLA ka Nongpoh Constituency u Bah Mayral Born Syiem mynta ka sngi ryngkat ki ophisar na ka tnad PWD ki la leit ban jurip ïa ka jingsdang ban siang rong ïa ka surok ba pynïasoh na Nongpoh sha Umden, kaba dei kawei na ka surok kaba donkam bha bad kaba shakri ïa ki paidbah jong ki spah tylli ki shnong sha ka thaiñ Umden Nongtluh ha Ri Bhoi District.
Kane ka jingmih u MLA ka Nongpoh ban jurip ïa kane ka surok, ka dei shi bynta ban peit ban khmih ïa ka jingsiang rong ïa kane ka surok kaba la pyntrei shaid shaid mynta haduh ha Umden bad kane ka jingsiang rong ka la sdang mynta na Iewmawlong ter ter sha Marngar, ha kaba u Contractor u la sdang ban siang rong bad kaba la pynphuh sam rkhie ruh ïa kiba bun ki paidbah ba ki la sdang ban suk ha ka leit ka wan.
Kum ban pynkynmaw, kane ka surok ka dei kawei naka surok kaba ki paidbah katei ka thain ki la mad jingjynjar ha ka leit ka wan na ka daw ka jingsniew jong ka surok, hynrei da ka jingshim khia ka sorkar lyngba ka tnad PWD ryngkat ka jingïatre lang bad u MLA la pynbha ïa kane ka surok ba ki paidbah ki la khmih lynti la kumno kumno shwa ka Christmas kin pyndep nohha kaba siang rong na Nongpoh sha Umden.
Haba kren mynta ka sngi sha ki lad pathai khubor, u Bah Mayral Born Syiem kum u MLA ka Nongpoh u la pynpaw ïa ka jingkmen kaba khraw ba la sdang ban siang rong said shaid ïa kane ka surok bad ka jingangnud ka long ban pyndep noh ïa kane ka jingsiang rong kham kloi khnang ba ki paidbah katei ka thain kin suk shisha ha ka leit ka wan.
Shuh shuh, u la ai ruh ka jingkhublei kaba kyrpang ïa u Myntri ka tnad PWD u Bah Prestone Tynsong bad ïa ka tnad PWD, namar dei lyngba ka jingshim khia jongki bad ka jingsngap lem ïa ka jingeh kipaidbah la lah ban siang rong noh ïa kane ka surok kaba khmih lynti ba mynta u snem kin pyndep noh bad ruh ban weng noh ïa ka jingeh ki paidbah ha ka leit ka wan da kaba kin ioh noh da ka surok kaba paka hadien ba la dep ban siang rong ïa kane ka surok, u la bynrap.
