Bei ka sorkar 4000 klur tyngka ha ki 240 tylli ki projek ban kyntiew ïa ka kam jngohkai

Shillong, Nohprah 02 : Ka Sorkar Meghalaya Democratic Alliance (MDA) kala bei pisa haduh 4000 klur tyngka ban pyntrei ïa ki 240 tylli ki project da ka jingthmu ban nang kyntiew shuh shuh ïa ka kam jngohkai ban wanrah ïa ka ïoh ka kot kaba ïaineh junom.
ïa kane la pyntip da u Myntri Rangbah ka Jylla Conrad K Sangma haba ai jingkren ha ka sngi kut jong ka jingrakhe jubili rupa jong ka jingpynïaid ïa ka Elephant Falls da ka San Shnong Youth Welfare Organisation (SSYWO) ha ka sngi Ba-ar.
U Conrad ula ban jur ïa ka jingaiti bad jingpynleit jingmut jong ka Sorkar ha ki kam jngohkai kaba dei kawei na ki kam ba plie shibun ki lad, ki kam ba ïai neh bad ba wanrah jingkylla nalor ka kam kaba lah ban pynurlong ïa ka thong ban kyntiew ïa ka ioh ka kot sha ka Billion dollar.
“Nga sngewtynnad ban pyntip sha phi ba ha kine ki hynniew snem shiteng, ngi la nang jam sha ka lynti jong ki jingkylla bad haduh mynta, ki don kumba 240 tylli ki project bala bei pisa haduh 3900 klur tyngka ha kane ka kam” ula ong haba batai ïa ki katto katne ki project ban sahnam ki ban sa mih bad ki ban sa pynkylla dur ïa ka kam jngohkai ha ka Jylla.
Haba ai khublei ïa ka SSYWO halor ka jingkynjoh ïa u mawmer ba 25 snem, ula ong ba u ihun shisha ban ïohi ïa ka jingjop jong ka imlang sahlang ban ïamih lang na ka bynta kawei ka thong. ‘Watla ka jingïaid lynti ka SSYWO ka long kaba eh hynrei ka jingrakhe mynta ka sngi ka long ka nuksa ban pyni ba kumno ngi lah ban kynjoh ïa kiei kiei haba ngi ïawanlang kum ka kynhun bad pynleit jingmut ïa ka thong ba ngi don” ula ong.
Ula bynrap ba tang ka kyrteng San Shnong ruh ka dei ka dak ka jingïatylli haba bynrap “San Shnong ka mut san tylli ki shnong kum ki san tylli ki shympriah jong ka kti hynrei haba ki san shympriah ki ïasohlang ka kylla long ka kti kaba ïeng ïa ka bor bad ka jingïatylli”.
Haba jubab ïa ka jingsngewkhia jong ka SSYWO ban don ïa ki don ki jaka leit bar ba paka ha Elephant Falls, ula ong ba ka jingdon ïa ki jaka leit bar kiba khuid ha ki jaka wankai ki nongjngohkai pyrthei ka dei kawei na ki mat ba hakhmat eh jong ka Tnad Jngohkai bad pyntip ba ka jingthmu ban shna ïa ka jaka leitbar ha Elephant Falls lyngba ka Corporate Social Responsibility kala ïaid shakhmat.
Ha kane ka sngi, u Myntri Rangbah ula pynkup burom ruh ïa ki nongseng jong ka SSYWO.