Yn pynlong biang ka SKDEJHD ïa ka jingpynkhalai nusib ïa ka 2nd Prize namar ba don ka jingthut

Khliehriat Nohprah 02 : Ka Organizing Committee jong ka Seiñ Kur Dkhar East Jaiñtia Hills District ka la iakut ban pynlong biang ïa ka jingpyniakhalai nusib ïa ka 2nd Prize jong ka Bumper Lucky Draw, jong ka Seiñ Kur Dkhar East Jaiñtia Hills District bad ïa kane yn sa pynlong ha ka 5 tarik mynta u bnai nohprah ha VO Office jong ka shnong Mookhep, East Jaiñtia Hills ha ka por 11 baje mynstep.
“Kum ban shu kdew hangne ba, ha ka jingshisha, ka SKDEJHD, ka la dep ban pyniakhalai nusib ïa baroh ki prize jong ka Lucky Draw jong ka, ha ka miet 28 tarik, mynta u bnai, ha ka shnong Mookhep, East Jaiñtia Hills, ha kaba ka jingpyniakhalai ïa kiwei kiwei ki prize ka la ïaid beit ïaid ryntih, hynrei ïa katei ka 2nd Prize pat, ka la don ka jingthut khyndiat ha ka rukom pyniakhalai ïa ka, ha kaba ki paidbah nongthied ticket lucky draw, kim hun satia ïa kata, bad ki la dawa ba dei ban pyniakhalai biang ïa katei ka 2nd prize sa shisien”
“Hooid, wat la ïa ka katei ka 2nd prize jong katei ka lucky draw la don hi ruh ba wan kam, hynrei da kaba sngap, burom bad ñiewkor ïa ka sur, ka jingdawa bad ka jngai jingmut ba dei hok jong ki paidbah, ka Organising Committee jong ka SKDEJHD, na ka bynta ka jingiahun lang jong baroh, ka la iakut ban pyniakhalai biang ïa ka ha katei ka sngi ba la kdew haneng bad na ka bynta kane, yn sa khot lang ruh ïa ki nongthoh khubor bad katto katne ki riew pawkhmat ha ka imlang ka sahlang, lada ki ïa lait por ban ïa donlang ban ïa sakhi lang ha katei ka sngi” ong u kyrwoh.
“Ha ka jingiadei bad ka jingpyniakhlai ïa baroh ki prize jong ka lucky draw jong Ka SKDEJHD, ka seng kur, ka kwah ban pynshai sha u paidbah baieid baroh ba, kam don kano kano ruh ka jingthmu ba sniew bad ka jingleh bym hok ba sha lyndet, hynrei la pyn leh ïa ki baroh da ka jingthmu kaba bha, kaba khuid bad kaba hok ha khmat u paidbah bad ki nongring video, hynrei wat la katta ka jingpyrshang ruh, hooid ha ka jinglong briew kan don beit hi ka jingduna hangne hatai kaba lah ban pynmong, pynsngewsih bad pynbitar ïano re ïano kumba la jia mynta. Kumta, ka SKDEJHD, ka kyrpad ïa ki paidbah nongkyrshan baieid baroh, ba kin sngewbha ban ym thew lane ñiew shuh ïa ki jingduna jingbakla na ka liang jong ka SKDEJHD ha ka jingpyniakhalai ïa katei ka prize ha katei ka sien kaba nyngkong, namar ba ïa mynta, da kaba sngap bad burom ïa ka sur jong u paidbah, yn sa pyniakhalai nusib biang ïa ka kat kum ba la kdew haneng”
“ Ha ka juh ka por , ka SKDEJHD, ka pynpaw ruh ïa ka jingsngewnguh ïa ki paidbah, halor ka jingkyrshan, jingpyni lynti, jingai jingmut, jingiaishah bad ka jingiatreilang jong ki bad ka seng kur, naduh ba sdang ban pyniaid ïa ki ticket lucky draw bad tad haduh mynta ka sngi bad nangne sha khmat ruh ter-ter. Ka SKDEJHD, ka kyrpad ruh ïa ki paidbah ba, kino kino kiba lait por, ba kin sngewbha ban wan ban ïa don lang bad ïa sakhi lang bad ka seng kur ha katei ka sngi bad ha ka por ba pynlong ïa ka jingpyniakhalai nusib biang ïa katei ka prize. Kane ka long kat kum u kyrwoh ba la pyllait da u Teras Dkhar, President bad u Besterwell Dkhar, General Secretary ka Seiñ Kur Dkhar East Jaiñtia Hills District.