Mawkyrwat, Naiwieng 30: Ha ka sngi Saitjaiñ jong ka taïew ka 29 tarik u Naiwieng 2025 ka Khasi Student’s Union (KSU) jong ka Mawkyrwat Circle ka la ïoh ban plie pyrda ïa ka lympung ïalehkai phutbol kaba tip kum ka 3rd Maitshaphrang Under – 16 Football Tournament 2015 – 2026 halor ka phang, “Em ïa u Drok” ha Rowell Lyngdoh Stadium, Mawlangwir South West Khasi Hills District.
Ha kane ka sngi plie pyrda, ka jingïalehkai sdang ka long hapdeng ka Mawten Sports Club pyrshah ïa ka Pynnoh Riwar Sports Academy bad ha kane ka jingïalehkai ka Pynnoh Riwar ka la jop da 1 – 0 kol ïa ka Mawten Sports Club bad ïa ka kol la thep da u Dangïaipyrkhat Khardewsaw ha ka minit kaba 52 kaba dei ha ka kyllamiet.
Nalor ka jingpynïalehkai kynjatbol, ka KSU Mawkyrwar Circle ka la ïoh ban pyllait paidbah ruh ïa ka kali kit nongpang ne ka Ambulance ha kaba u Vice – President KSU Central Body, u bah Biangbor Paliar u la long kum u kongsan uba la ot ïa u ribon kum ka dak jong ka jingpyllait paidbah ïa kane ka kali.
Ha kane ka sngi la don lang u Bah H.S.Diengdoh, MCS, SDO barim ka Ranikor Civil Sub Division, u bah Forwardman Nongrem, President KSU South West Khasi Hills District, u bah Polin Lyngdoh, Secretary Shnong Mawlangwir, u bah Rutherford Lyngdoh, President KSU Mawkyrwat Circle, ki dkhot ka KSU South West Khasi Hills District bad ki dkhot jong ka Mawkyrwat Circle lem bad kiwei kiwei ki riew Rangbah.
