Kyrpad ki Mustel Roll ïa u CM ban khot ïakren hapoh 10 tarik Nohprah, byrngem ïakhih lada mynthi

Shillong, Naiwieng, 28: Ka Joint Action Committee Muster Roll Workers Union (JACMRWU) ha ka sngi Thohdieng ka la aiti da ka jingthoh ha u Myntri Rangbah ka Jylla u Conrad K. Sangma ban pynlong ïa ki jingdawa ba la sah teng jong ki nongtrei muster roll, kynthup ruh ka jingpyllait noh ïa ka pisa arrear kaba dang sahteng, ka jingpyntreikam ïa ka Basic Floor Rate bad ban kyntiew ïa ka Variable Dearness Allowance (VDA).
Ha ka jingïakren bad ki lad pathai khubor u General Secretary jong ka Joint Action Committee u Bah Bympher Lyndem u la ong, “ngi la aiti ïa ka jingthoh ha ka ophis u Myntri Rangbah mynta ka sngi bad ngi la kyrpad ba un khot ïakren ïa ngi hapoh ka 10 tarik, Nohprah, 2025 ban ïa kren halor ki jingdawa jong ki nongtrei Muster Roll hynrei lym kumta kumba ngi ladep ban shim rai ngin pynlong da ka jingïakhih peit miet Christmas hakhmat Secretariat.”
“Ngi dei kiba ju pynkhuid ïa ki surok bad ha ki ophis bad ngi sngew sarong ban shakri ïa ka jylla bad ïa ka jaitbynriew. Ngi kyrpad ban leh mardor ïa ki jingeh jong ngi bad ban pynthikna ïa ka lawei jong ngi kum ki nongtrei kiba shisha,” la ong ka seng ha ka shithi sha u Myntri Rangbah.
Ka seng ka la pynpaw ïa ki jingeh kum ka jingsahteng jong ka Consumer Price Index, ka jingkiew dor bad ka jingbym don ki jingmyntoi na ka imlang sahlang, kynthup ïa ka Employee Provident Fund bad ka shuti kha khun.
“Ngi kyrpad ïa u Myntri Rangbah ban pyrkhat lem ban kyntiew ïa ka kyrdan jong ki nongtrei kiba la shakri palat san snem khlem shongthait bad ban pyntreikam ïa ki skhim Meghalaya Regular Casual Workers 1996,” la ong shuh shuh ka seng.
Ka seng ka la ai jingmut ruh ba ka rta shongthait ïa ki Muster Roll kam dei ban palat ïa ka 65 snem ka rta.
Ka seng ka la kyrpad ruh ïa u Myntri Rangbah ban kynthup ïa ki nongtrei Muster Roll hapoh ka Employee Provident Fund bad ban ai ruh ïa ki jingmyntoi.