Nongpoh, Naiwieng 28: Ha ka jingjia aksiden kaba la jia ha ka sngi Palei ha surok Shillong By-pass ha shnong Pyllun hajan ka Umroi Military, iwei i heprit ba dang 8 snem ka rta, na ka shnong Pyllun Block-V, i la khlad noh na sla pyrthei bad kata ka dei hadien ba i la shah syllad ha kawei ka Trok Container kaba don ïa u number UP-82-BT-5107 bad kaba la niah da u Girish Chandra.
Katei ka jingjia, ka la jia ha ka por 9 baje eiei mynstep, kata ha ka por ba itei u heprit i dang thmu ban leit skul, hynrei ha ka por ba i dang ïaid ha surok, la wan ka trok kaba la syllad ïa i, kaba la pynlong ba in khlad noh hashen.
U nongniah ïa katei ka trok, haba u la dep ba syllad bad iuh ïa itei i heprit, u la pyrshang ban phet bak da ka kali, hynrei donbok ba don kiba ïohi bad ki la beh ha kaba ki la ïoh ban bat noh ïa u ha ki bynta jong ka shnong Umeit.
Haba ïadei bad katei ka jingjia, ki Pulit ki la kem noh ïa u nongniah bad ïa ka kali ki la rah noh sha thanad.
