Nongpoh, Naiwieng, 28: Tang na ka daw ba ki leit ban pom dieng na ka khlaw shnong ba donkam ha shnong thaw, ki ar ngut ki nongshong shnong na ka shnong Belahari ki la shah kem ha ki nongtrei ka tnad Forest Assam, ba kynnoh ba ki wan pom dieng beaiñ sha u pud u sam ka Assam katba katei ka khlaw pat ka dei ka khlaw shnong jong ka shnong Belahari ba hap ha ka thaiñ Ri Bhoi Sepngi.
Kitei ki 2 ngut ba la shah kem ha ki nongtrei ka tnad Forest Assam ha ka sngi Palei ki kynthup ïa u Benustar Nongphlang bad uwei pat uba dang rit ka rta, uba ki la pynlait noh hadien ba la kem ïa u.
Haba ïa thuh halor kane ka jingjia,, u Deputy Commissioner ka Ri Bhoi, u Abhilash Baranwal u la ong ba kane ka jingshah kem kitei ki 2 ngut la kynnoh ba dei ka jingleit pom dieng bad na ka liang jong u kum u khlieh ka District u la shimkhia ban ïakren sha ki bor synshar District ka Kamrup ban pynlait noh ïa u rangbah uba la shah kem bad uba dang mynta ha ka jingtohkit ka tnad Forest na Assam.
U la bynrap ruh ba kum u khlieh duh ka District ula shim khia ban ïa kren halor kane ka kam bad u la dep ruh ban bthah ïa u DFO ba un shimkhia ban ïakren bad u la pynpaw ka jingkyrmen ba ki bor synshar kan pynlait noh ïa u rangbah uba la shah kem ha ki nongtrei ka tnad Forest na Assam.
