Jowai, Naiwieng, 27: Ka Mihmyntdu Community Social Welfare Organisation (MCSWA) mynta ka sngi 27 tarik u Naiwieng kala pynlong ïa ka Medical Check-up naka bynta ki riew tymmen kiba la noh ka rta ne ki (Senior Citizen) ha MCSWA Drop-In & Day Care Centre kaba don ha Lion Mission Compound, Jowai.
Hashwa kane kala don ka jingïalang bad la ïoh ka jingkren lamkhmat na ka Dr. J.N. Shullai, Director Mihmyntdu Community Social Welfare Organisation (MCSWA), kaba la pynsngew halor ka thong ba pynlong ïa kane ka prokram, da kaba ong mynta ki sngi kiba bun ki briew kila duh noh ïa ka jingim khlem da poi pyrkhat haka por ba ki dang don hadpeng ka met kaba koit ba khiah bad kiba dang ïaid sharung shaneng.
Halor kane ka daw kum ka Director ka MCSWA kala shim ïa kane ka bynta ban jurip ïa ka koit ka khiah jong ki briew kiba la heh ka rta ne kiba tymmen kiba dei ruh ki dkhot ka MCSWA Drop-In & Day Care Centre ba kin ïoh jingsumar na ka bynta ka koit ka khiah jong ki lyngba ka jingtest snam bad ka ECG.
Kum ban shu pynkynmaw ka MCSWA Drop-In & Day Care Centre kaba don ha Lion Mission Compound, Jowai ka dei ka jaka sumar ïa ki riew tymmen (Senior Citizen) kaba la pynïaid da ka Mihmyntdu Community Social Welfare Organisation (MCSWA) ha ryngkat ka jingïatreilang bad ka District Social Welfare Department, West Jaiñtia Hills.
