Sei ka AMKA 126 ngut ki nongïalehkai ban ïa shim bynta ha ka National Kickboxing C’ship 2025 ha Orissa

SHILLONG, Naiwieng 27: Ka All Meghalaya Kickboxing Association (AMKA) ka la pynbna ïa ka kynhun ki khynnah ïalehkai Kick Boxing, khlehlang Shynrang/kynthei kaba don 126 ngut ki ban leit ïashim bynta sha ka National Kickboxing Championship 2025 ha Orissa.
Ïa kane la pyntip da u Executive Member jong ka AMKA, Bah Ïengtylli Skhemlon ha jingïalang bad ki lad pathai khubor ha Shillong Press Club, ha ka sngi Palei, 27 tarik Naiwieng, 2025.
Kane ka 29th Senior/28th Junior/28th Sub-Junior National Kickboxing Championship 2025 ka ba saw sngi lynter kan sdang naduh ka 04 tarik haduh 07 tarik Nohprah 2025 ha Nongbah Bhubaneshwar, Orissa bad la pynïaid ïa ka daka Indian Association of Kickboxing Organisation (IAKO).
Ha kane ka sienjam kaba mynta ka AMKA hapoh ka jingïalam jong u President, Bah Samuel Hashah ka la ïoh ban jied haduh 55 ngut ki nongïalehkai shynrang bad 71 ngut ki kynthei ban pynlong ïa ka kynhun kaba don 126 ngut baroh. Ka kynhun kan ïashim bynta naduh ka kyrdan Tiny Tots, Sub Junior, Junior bad Senior.
Ïa ka kynhun yn synran lang da ar ngut ki Referee, 2 ngut ki Coach, 4 ngut ki Team Manager lem bad 6 ngut ki Official, baroh ki long 140 ngut haba kyllum lang.
Ïa ka kynhun la jied katkum ka jinglah jong ki khynnah ban pynpaw ïa ka sap ha ki Selection Trial bad kiba la pyndep lyngba ki prokram pynkhreh ba la pynlong haki District Training Centre ba ka AMKA ka la buh.
Ka kynhun kan mih na Shillong ha ka 02 tarik Nohprah bad kan poi ha ka 04 tarik Nohprah shi sngi ahuwa baka Championship kan sdang (kata ha ka 05 tarik Nohprah).
Na ka liang jong u Bah Ïengtylli Skhemlon u la ong, “Ngi kyrmen skhem ba mynta u snem ngin ïoh ban wanrah shibun ki takma bad kumjuh ruh ban ïoh rah ïa ka Over All Team Champion ha kane ka sien ba mynta”.