Ba khang tyrwa soh ka Municipal ïa ki Nongdie soh ha Khyndai Lad pyrshah jur u MLA ka Mawkynrew

Shillong, Naiwieng 26 : U MLA ka Mawkynrew Constitency uba long ruh u Adviser jongka tnad ba peit ïa ka kam rep kam riang (Agriculture) hapoh ka jylla u bah Banteidor Lyngdoh u la pynpaw ka jingsngewpyrshah jur ïa ka jingwan khang jubor jong ki ophisar ka Municipal ïa ki nongtyrwa soh bad sha ban die ha ki thaiñ Khyndai Lad da kaba pynpaw ba kine kim shym la wan ban shong dukan ha Khyndai Lad hynrei ki shu wan tang ban tyrwa ïa ki soh khamtam ha kum kine ki por ba ih u soh niamtra ki shu ot bad die sha ki nongleit nongwan bad khamtam ïa ki briew kiba wan jngoh kai ïa ka nongbah Shillong kiba bun bah na ki ki sah ha ki thaiñ Police Bazar hi.
U la ong “ Ngam lah ban shah ïa kane ka jingleh jubor jong ki ophisar jongka Municipal ïa kiba duk ba rangli kiba im kamai kyndoi jakpoh tang na kaba shu tyrwa soh bad sha ban ïoh thied bam ïa ki khun ki kti ha la ïing la sem. Ngan rah ïa kane sha ki bor kiba halor namar kine kiba pli ki shu im kamai kyndoi jakpoh bad ïoh nong tang 50 lane 100 tyngka shisngi kumta ban khang ïa ki ban tyrwa soh bad sha ha Khyndai Lad ka long ka jingleh thombor”.
Mynta ka sngi ha ka por janmiet katba ki Nongdie soh ha ki shang kiba ju leit tyrwa kylleng ki jaka ka sor Shillong ki la wan ban tyrwa soh sha kiba ïaid ba ïeng ha Khyndai Lad kynsan kynsan la wan ki briew jongka Municipal bad khang ïa ki ban die ïa ki soh bad kumjuh ruh ïa kiba die sha da kaba knieh ïa ki shang ki jongki. Kine ki nongdie kiba la kiew ka jingbitar ki la kthong ïa ki ophisar jongka Municipal bad phah ba kin bam ïa u soh jongki namar kim shah ïa ki ban die. Da ka jingsngewthuh ba kum ki ophisar ki la leh bakla hadien katto katne por kine ki ophisar ka Municipal ki la phet iam rem na katei ka jaka.