Jowai, Naiwieng 26: U District Magistrate (DM) jong ka West Jaiñtia Hills District u Abhinav Kumar Singh, IAS, mynta ka sngi ula pynmih ïa ka hukum ba la pynjari da ka pakhang miet (Night Curfew) ha baroh shilynter ki bynta khappud jong ka District bad ka Ri Bangladesh.
Ïa kane ka jingpynjari curfew miet la hap ban leh na ka daw jong ka jingbymshngaiñ ka long ka man ne ka shongsuk shongsaiñ hapoh ka ri Bangladesh.
Katkum kane ka hukum la khang ïa ka leit ka wan kaba jngai 200 metres, na u zero line (International Border), naduh ka por 8:00 PM haduh 6:00 AM.
La khang ruh ïa ka jingïalum briew kaba palat ïaka 5 ngut, lane ban rah ïa ki tiar pynmynsaw. La khang ruh ïa ka jingkhaï beaiñ ha baroh shilynter ki bynta khappud ka District bad ka Ri Bangladesh.
Kane ka hukum kan treikam noh naduh mynta ka sngi 26/11/2025, tad haduh ban da pynmih da kawei pat.
