Khliehriat, Naiwieng 26 : Ka Jaiñtia Students’ Union (JSU) Central Body hadien ba ka la ioh ïa ki jingujor na ki kmie ki kpa bad ki nongshong shnong ha kaba iadei bad ka jingsniew ka bam ka dih ba ai ïa ki khynnah skul ha skul Jawahar Navodaya Vidyalaya (JNV) kaba don ha shnong Rymbai East Jaiñtia Hills District, kumjuh ruh halor ka jingtip ba la ioh ba ki don bun ki khynnah skul kiba la ioh pang prie, pynhiar naduh ka 22 tarik mynta u bnai naiweing ha kaba bun ki khynnah la sumar ha Rymbai PHC ka seng mardor hi ka la pynlong ïa ka jingjurip
Kiba la ia don ryngkat lang ha katei ka jingleit jurip ki kynthup ruh u President, JSU Khliehriat Circle, u bah Livingson Sama, u samla Waimi Rymbai bad kiwei kiwei kiba dei ki dkhot ka JSU na ri lum Jaintia
Halor katei ka jingkem pang kynsan jong ki khynnah skul ka JNV ba la suba ba dei namar ka jingsniew ne jingleh jakhlia ha ka rukom ba shey bam , mardor ki nongialam ka JSU ki la pyntip ruh sha u Food Safety Officer (FSO) for East Jaiñtia Hills,u bah M. Diengdoh bad kyntu ba u dei ban pynlong ïa ka jingjurip kaba kham kloi bad jurip ruh ïa ka rukom shet bam ha katei ka skul JNV.
Kitei ki nongialam ka seng lem bad ki dkhot ha ka jingdon ryngkat lang bad ki nongtrei jong ka JNV Rymbai, ka Principal JNV Rymbai,Mess Incharge bad ka Medical Sister ki la leit ban jurip lang ïa ki jaka ba shet jingbam ïa ki khynnah bad lap ban ka jaka ba shet jingbam kam long kaba khuid ba suba ha katei ka skul.
Ha ka jingjurip ka JSU ka la lap ruh ba ka rukom shet ïa jingbam ïa ki khynnah skul kam dei kaba bit ba biang bha ha ka khuid ka suba, ki nongtrei bad ki ba sam ïa ka bam kim shym pyndonkam ïa ki mask, ki siang, ki sahmoit bad kiwei kiwei ki tiar ban wanrah ïa ka khuid ka suba.
Shuh shuh la lap ba ka jaka leit shabar ne paiñkhana ruh ka don hajan eh ka jaka bam ki khynnah ne ka mess hall kaba lah ban wanrah bun ki khñiang jingpang, ka um dih, um bam ruh kam dei kaba khuid kaba i kumba ki pyndonkam da ka um sarang.
La ong ruh ba u Head Boy jong katei ka skul JNV u la iathuh ba ki la don haduh 39 ngut ki khynnah skul kiba la kem shitom kyndit ha kaba 20 ngut ki dei kiba la kem pang myn ha ka step jong ka 25 tarik naiwieng.
Ki nongialam bad ki dkhot ka JSU ki la leit jurip ruh ïa ka PHC Rymbai bad ki la iakynduh bad iakren bad u Medical Officer bad une u doctor u la ïa pynpaw ka jingsngew khia halor kane ka jingkem pang kynsan ki khynnah skul kiba la ioh pang prie pynhiar bad la suba ba dei na ka daw ka jingsniew ka bam ba ki bam bad ong ruh ba ka jingbym don ka khuid ka suba ha ka jaka shet bam ha katei ka skul ka lah ban wanrah bunjait ki khñiang jingpang ha ki khynnah, la ong ruh ba ki la don bun ngut bha ki khynnah kiba la wan shah sumar ha katei ka jaka ai jingsumar ha PHC Rymbai.
Ki nongialam bad ki dkhot jong ka Jaiñtia Students Union ki la jurip ruh ïa ki sawdong sawkun ha ka phyllaw jong ka skul JNVbad ki la iakynduh ruh ba du Site Engineer uba pyntrei ïa katei ka skul u bah Lakhon Pasweth bad ka jingpyntrei kan dei kaba hapoh ka mang tyngka kaba haduh kumba T20 klur tyngka ha kaba haduh 95 percent la dep ban pyntrei bad kaba dang sah mynta ka dei tang ka bynta ba iadei bad ka bor ding bad kaba pynpoi um bad la khmihlynti ba yn lah ban pyndep lut hapoh une u snem 2026.
La ong ruh ba na ka liang ka Principal jong katei ka skul ka la don ka jingthmu ban pynkynriah noh ïa ki khynnah sha ka ïing skul ba la dep shna thymmai bad na ka liang ka seng ka sngew ba kane ka jingpynkynriah ïa ki khynnah sha ka ïing skul ba thymmai kam pat biang namar ba ka jingpyntrei ïa ka bynta jong ka Phase-B ka dang iaid shaid shaid bad ka lah ban buh jingma pynban ïa ki khynnah skul.
Na ka liang ka seng ka pynrem jur ïa ka jingleh bym salia ki bor ba dei peit ïa ka bha ka miat jong ki khynnah, ka seng ka dawa na ki bor pyniaid jong katei ka skul JNV Rymbai ba ki dei ban peit bha ha kaba iadei bad ka khuid ka suba ka bam ka dih ha ïa ki khynnah .
Shuh shuh ka seng ka dawa na ki bor ba dei peit Food and Safety ba kin shim khia ban leh ei ei ha kaba iadei bad ka khuid ka suba ha katei ka shlem ai jinghikai ha JNV Rymbai, ka kyntu bad maham ruh ba ym dei ban pynkynriah ïa ki khynnah sha kawei pat ka ïing skul lada ym pat dep shna namar ka lah ban buh jingma ïa ki khynnah.
