Mawkyrwat, Naiwieng 26 : Ka Hynñiewtrep Youth Council (HYC) jong ka Ranikor Circle hadien ar bnai ka la hiar jurip biang ïa ka Nongnah Veterinary Dispensary ha kaba ki la lap ba ka tnad treikam jong katei ka jingtei ka ophis ki la dep ban wan pynbha ne maramot ïa ki ïit kiba la pait bad pynbha ruh ïa ki rong ki rup baroh.
Namarkata, ha ka jingleit jurip jong ka seng ïa ka Nongnah Veterinary Dispensary ha ka jingïalam jong u Billy Kharlartang uba dei u President jong ka HYC Ranikor Circle la ong ba ki la lap ba ka la itynnad ym kum ha ki bnai ba la dep pynbna watla ka la ithynnad hynrei dang long ïingjah haduh mynta khlem da don ki nongtrei.
Kumta, ka HYC ka la pynpaw ba lada don tang ki jingtei ne ka building hynrei khlem don briew ne khlem ki nongtrei, kita ki jingtei ki long leh noh ei, namarkata, ki la dawa ba haba wan buh ki ïing treikam jong kano kano ka tnad treikam dei ban long ha ka dur kaba paka khnang ba ki paidbah kin nym duh nong lada ki leit na ka bynta ki jingdonkam.
Shuh shuh ki la buh ruh ka jingkyrpad ïa u MLA jong ka Ranikor Constituency ba u dei ban shimkhia lem ïa kane ka kam khnang ba kan nym long ka jingduhnong ïa ki paidbah jong ka dong ka thaiñ.
