Ai jinghikai ka DDMA-EJH ban ïada ïa ki parabriew haba wan ka jinglynshop mariang

Khliehriat, Naiwieng, 25: Ka ophis District Disaster Management Authority (DDMA), East Jaiñtia Hills District mynta ka sngi ka la pynlong ïa ka prokram ai jingai jinghikai lane ka Training Programme on Block Incident Response Team (IRT)kum ka jingpynkhreh ha kano kano ka por ba donkam ban ai jingïarap kyrkieh.
Ha ka prokram ai jinghikai ba la pynlong ha ka ophis Block Development Officer, Wapung C&RD Block, Khliehriat la ïa don ryngkat lang ka District Disaster Management officer (DDMO), East Jaiñtia Hills District, ka kong Donna L. Kharkongor, Junior Rural Development Officer (JRDO), Wapung C&RD Block, kong N Dkhar, Fireman, Fire & Emergency Service, East Jaiñtia Hills District, u bah H Lamare, Havaldar, Civil Defence & Home Guards, West Jaiñtia Hills District, u bah P Ranee, Gram Sevaks jong ka Wapung bad Lumshnong Block, ki dkhot jong ki kynhun Self-Help Group (SHG).
Haba kren ha ka jingïalang ka District Disaster Management officer (DDMO), East Jaiñtia Hills District ka la kren halor ka jingdonkam ban ai ki jingïarap ba kyrkieh lane ka Incident Response System (IRS) kum ka jingïatreilang ha ka por ba donkam kyrkieh, ka la batai ruh ba kumno kane ka IRS ka ïarap ban pynïaid beit ïa ki kam ai jingïarap kyrkieh bad don ruh ka jingkitkhlieh bad ka jingïatreilang bad kiwei kiwei pat ki kynhun ai jingïarap bad pyntikna ruh ba ka jingai jingïarap kan ïaid beit ha ka por ba donkam kum ha kino kino ki jingjia ba shah lynshop.
Ka la batai shuh shuh ba kane ka Incident Response System (IRS), ka dei ka rukom treikam kaba kham bha lane ka standardized framework kaba ju pyndonkam bad ka IRS ka dei thik ka bynta ba treikam ki Incident Commander, Operations Section, Planning Section bad Logistics Section ha kaba baroh ki dkhot ki tip ïa la ka jong ka jingkitkhlieh ban atreikam ha ka por ba donkam kyrkieh, kane ka pynkloi ïa ki kam, ka pynduna ïa ka jingsngew klumar jingmut ka ïarap ban pyllait im ïa ki biew, kanka ong ruh ba ban sngewthuh ïa kane ka rukom treikam ka long kaba donkam haduh katta katta kan ïarap ruh ha kum kane ka por ba dang pynkhreh kaba dang ai jinghikai bad pynkhlaiñ ruh ïa ki rukom ai jingïarap naduh ki Block Level bad ki shnong ki thaw.
Kum shibynta jong ka prokram ki nongtrei jong ka Civil Defence bad Home Guards ki la ai ki jingbatai bad ai jinghikai da kaba pyni nuksa halor ki rukom kumno ban ai jingsumar kyrkieh, ki ai jinghikai ruh ïa kiba wan ban ïa shimbynta ha kane ka prokram kumno ban pyndonkam da ki jaiñ kiba khuid ban sop shipor ïa ki jingmong jingmynsaw, katei kakynhuh ai jinghikai ka pyni nuksa ruh kumno ban ai jingkyrshan ïa kito kiba la kheiñ ki kti ki kjat, ïa kito kiba mynsaw na khlieh ban ïarap shipor haduh ban da poi sha ki jaka ai jingsumar, ki hikai ruh kumno ban pyndonkam ïa ki jingthiah Stretchers .
Ki kynhun kiba ai jinghikai bad pyni nuksa kiba na ka tnat Fire and Emergency Services ki hikai kumno ban pyllait im ïa ki briew lada jia kano kano ka jingpluh ding, ki batai ruh ïa kiba bun ki daw jong ka jingpluh ding, ki pynshai ruh ïa ki jait tiar ba dei ban pyndonkam ban ïada na ka jingpluh bad ban tehlakam ïa ka jingpur ka ding bad kumno ban ai jingïarap kyrkieh ïa ki briew kiba ngat ha ka apot pluh ding.