New Delhi, Naiwieng 25: U Myntri Rangbah duh ka ri, u Narendra Modi un ïashim bynta ha ki jingrakhe ïa ka Constitution Day ha Central Hall jong ka Samvidhan Sadan ha ka 26 tarik Naiwieng ha ka por kumba 11 baje mynstep. Mynta u snem ka dei ka jingdap 76 snem jong ka jingpdiang ïa ka Riti Synshar jong ka.
Ha kane ka jingrakhe yn sakhi ïa ka jingïashim bynta ka President jong ka ri India, Vice-President, Lamphang ka Lok Sabha, ki dkhot jong ka Parliament na baroh artylli ki ïingdorbar thaw aiñ, nalor kiwei pat.
Ka President jong ka India kan ïalam ïa ka jingpule ïa ka Preamble jong ka Riti Synshar jong ka India ha kane ka prokram. Shuh shuh, yn pyllait paidbah ïa ka Riti Synshar jong ka India ba la pynkylla ha khyndai tylli ki ktien ba kynthup ïa ka Malayalam, Marathi, Nepali, Punjabi, Bodo, Kashmiri, Telugu, Odia bad Assamese. Ha kane ka prokram yn pyllait paidbah ruh ïa ka kot lyngkdop.
