Ngi sngewkmen ba ki samla ki la shim khia ïa ka kam ri dohkha ban kamai jakpoh: TD Shira

Shillong, Naiwieng 23: U Myntri ka sorkar jylla uba khmih ïa ka tnat Fisheries u Timothy D Shira ula banjur ïa ka jingkiew shaphrang ka jylla ha ka kam ri dohkha bad pynpaw ïa ka jingkongsan ban ïada ïa ki um khlaw bad ki wah da kaba pynpaw ïa ka jingkmen jong ka sorkar ban ïohi ba bun na ki samla jong ka jylla mynta ki la shim khia ïa ka kam ri dohkha na ka bynta ban kamai jakpoh.
Haba kren ha ka jingrakhe ïa ka World Fisheries Day u Shira ula ïaroh ïa ka jingtrei shitrhem ki samla kiba la shimkhia ïa ka kam ri dohkha kum ka lad kamai jakpoh bad ong ruh ba kane kadei ka jingleh kaba bha kaba ïaid ryngkat bad ka jingïohi jngai jong ka jylla khamtam ha ka ban kyntiew ïa ka jingsengkam lajong ha ki thaiñ nongkyndong.
U Myntri ula banjur ïa ka jingdonkam ban don ka roi ka kiew ka ban ïaid ryntihlang bad ka jingïada bad pynneh pynsah khamtam haba ka kam ri dohkha kadei kaba ïadon bynta lang bad ka imlang sahlang bad ka ïoh ka kot jong ki shnong ki thaw ha nongkyndong.
U la ong ruh ba ïa ki sienjam kiba la shim da ka sorkar jylla lyngba ka tnat Fisheries kaba kynthup ïa ka jingkyntiew ïa ka jingri dohkha katkum ka juk stad saïan, ka jingbuh ïa ki jaka pynkha ïa ki symbai dohkha, ka jingai jinghikai pyntbit ïa ki nongri dohkha bad ban pynkhlaiñ ïa ka imlang sahlang kiba pynïaid ïa ki jaka ri dohkha.
U Myntri u la ong, ba ka sorkar jylla ka ïengskhem halor ki jingkular hapoh jong ka Pradhan Mantri Matsya Sampada Yojana (PMMSY) ban kyntiew ïa ka jingpynmih ïa ki dohkha bad ban kyntiew ïa ka kamai kajih jong ki nongri dohkha.
U Myntri u la kyntu ban don ïa ka jingïatreilang hapdeng ki tnad sorkar, ki jaka pule kiba wad bniah bad ki shnong ki thaw ban pynthikna ba ka Meghalaya kan kylla long kum ka nuksa, ba ka jingri ïa ki dohkha kan dei kaba ïahap bad ka mariang ha ka thaiñ.
Ula pynpaw ruh ba ka sorkar ka ïengskhem ha ka ban bteng ban ai ka jingkyrshan ïa ki nongri dohkha lyngba ki jingtei kiba kongsan, jingai jinghikai, ka jingplie lad ban ïoh ïa ka pisa bad ka jingsdang pyntreikam ïa ki kor teknoloji.
Ha kane ka jingïalang la ïadonlang u Harish Chandra Chaudhary, IFS, Principal Secretary ka Tnad Fisheries ryngkat bad u Director bad Joint Director ka tnad Fisheries.
Na ka liang u Principal Secretary ula kren shaphang ka jingdon ïa ka jingïadei kaba ïajan bha hapdeng ka sawdong sawkun ka mariang kaba koit ba khiah bad ka jingïaid shaphrang jong ka kam ri dohkha.
Ula banjur ba ka tnad Fisheries Department ka la ïaid shakhmat hapoh ka jingïalam u Myntri Rangbah ka Jylla u Conrad K Sangma ryngkat bad u Myntri uba khmih ïa ka tnad Fisheries bad ruh da ka jingkyrshan kaba pura na ka Sorkar India.
U Principal Secretary ula pyntip ba ïa ka Draft Bill ban pynneh pynsah, ban kyntiew bad ban pyndonkam ïa ki jingdon jingem ha kaba ïadei bad ka jingpynmih ïa ki dohkha kadei kaba dang pynkhreh pura da ka sorkar Meghalaya, kaba pynleit jingmut ha ka ban don ïa ka jingpynïaid ka ban neh shirta, ki jingpyrkhing bad ban ïada ia ki dohum dohwah bad ïa ka sawdong sawkun ka mariang.
Shuh shuh ha kane ka jingïalang la pynkup burom ruh ïa ki nongrep bad ki nongsengkam kiba la noh synniang bha ha kaba ïadei bad ka kam ri dohkha, ha kaba kila ïoh pdiang ïa ki khusnam bad ïa ka song tyngka bad la ïoh ruh ïa ka jingkren na ki nongri dohkha kiba la ïathuh ïa ki khana jop ki jong ki bad ka la don ruh ka jingpyni ïa ka jingri dohkha da kaba pyndonkam ïa ki buit katkum ka jingstad saïan bad ka rukom pynïaid ïa ki jaka ri dohkha da kaba don ïa ka jingkitkhlieh bad kaba myntoi hi ïa ka jylla baroh kawei.